फोंडा: मोले अभयारण्य क्षेत्रातील वळंडव येथील सागवानाची दोन मोठी झाडे कापून त्याचे १३ तुकडे करून चोरून नेण्याच्या प्रयत्नात असताना वन खात्याचे आरएफओ अनिल फर्नांडिस व इतर कर्मचाऱ्यांनी रघु नाईक (२६, कुंकळ्ळी) व दिलीप तलवार (४२, किर्लपाल भगवती) यांना रंगेहात पकडले आहे.

वन खात्याने दिलेल्या माहितीनुसार, वळंडव येथील उमेश नामक व्यक्तीने आपल्या जमिनीत सागवानाची मोठी झाडे असल्याचे सांगून २५ हजार रुपयांत कापून नेण्यासाठी दिली होती. त्यानुसार कुंकळ्ळी येथील रघु नाईक व दिलीप तलवार यांनी ती झाडे कापली व १३ तुकडे केले होते. त्यानुसार वन खात्याचे कर्मचारी त्यांच्या पाळतीवर होते. आज सकाळी रघू व दिलीप घटनास्थळी आल्यानंतर त्यांना मुद्देमालासह फर्नांडिस यांनी इतर कर्मचाऱ्यांनी ताब्यात घेतले आहे. उमेश नामक व्यक्तीला उद्या रितसर ताब्यात घेणार असून वन कायद्यानुसार पुढील कारवाई करण्यात येणार असल्याचे वन खात्याच्या अधिकाऱ्यांनी सांगितले.