वेळुस नदीच्या पाण्याची पातळी वाढू लागल्यामुळे नदीच्या बाजूला असलेल्या रामा गावकर यांच्या बागायतीत पाणी घुसून मोठे नुकसान झाले आहे. गुरुवारी रात्री मुसळधार पावस होता, त्यामुळे नदीच्या पाण्याची पातळी अचानक वाढली. मात्र शुक्रवार सकाळपासून पावसाचा जोर कमी झाल्याने पाणी कमी झाले आहे. वेळुस येथील ही मोठी नदी असल्याने जोरदार पाऊस पडू लागला की या नदीला पूर येतो. या पावसाळ्यात पहिल्यांदाच नदीच्या पाण्याची पातळी वाढली आहे.

रामा गावकर यांनी सांगितले की, दर वर्षी वेळुस नदीच्या पाण्याची पातळी वाढली की नदीला पूर येतो व आमची बागायत पाण्याखाली जाते. यंदा तसा पाऊस नव्हता. मात्र गेल्या काही दिवसापासून पडत असलेल्या पावसामुळे बागायत पाण्याखाली गेली आहे. त्यामुळे केळीची झाडे उन्मळून पडलेली आहेत. तसेच मोठ्या प्रमाणात बागायतीचे नुकसान झाले आहे. नदीवर बंधारा बांधल्यापासून ही स्थिती निर्माण होत आहे. बंधाऱ्यावर वाहून आलेली लाकडे अडकली असल्याने पाण्याचा निचरा योग्य प्रकारे होत नाही. त्यामुळे पाणी बागायतीत घुसते. संबंधित खात्याने पावसाळ्यापूर्वी येथील गाळ योग्यप्रकारे साफ केला नव्हता, त्यामुळे पाणी तुंबते. सुदैवाने पावसाचा जोर कमी झाल्याने आणखी कोणती हानी झाली नाही.

सरकारने नदीच्या ठिकाणी संरक्षण भिंत बांधून दिली पाहिजे. यासाठी अनेकवेळा पत्रव्यवहार सुद्धा केलेला आहे, मात्र अजून काही झाले आहे. मी एक शेतकरी असून अश्या प्रकारे केलेली मेहनत पाण्याखाली जात असल्याचे दुख होते. दरम्यान, संध्याकाळी पावसाचा जोर कमी होता.