Gomantak Editor Raju Nayak Best Editor Award

पणजी: आजकाल कुणीही मोबाईल काढून पत्रकार म्हणवून घेत असल्याने पत्रकारिता क्षेत्रात एक प्रकारची गोंधळाची स्थिती निर्माण झाली आहे. सोशल मीडियाच्या चुकीच्या बातमीला मीसुद्धा बळी पडलेलो आहे. अशा स्थितीमुळे खऱ्या पत्रकारांची बदनामी होते, असे प्रतिपादन वाहतूक तथा पंचायतमंत्री माविन गुदिन्हो यांनी केले.येथील इन्स्टिट्यूट मिनेझिस ब्रागांझा संस्‍थेच्‍या सभागृहात झालेल्या राष्ट्रीय पत्रकारदिनाच्या कार्यक्रमात गुदिन्हो बोलत होते. यावेळी गोवा पत्रकार संघटनेचे (गुज) अध्यक्ष राजतिलक नाईक, माहिती खात्याचे संचालक दीपक बांदेकर उपस्थित होते.

‘समता आणि बंधुतेची जिवंत प्रतिके’ या गटात संपादकीय लेखासाठी राष्ट्रीय एकात्मता आणि सांप्रदायिक सौहार्द श्रेणीतील ‘सर्वोत्कृष्ट संपादक’ म्हणून ‘गोमन्तक’चे संपादक-संचालक राजू नायक यांना पुरस्कार प्रदान करण्‍यात आला. तर, पत्रकारितेत अनेक वर्षे योगदान दिलेले ‘गोमन्‍तक’चे सहवृत्तसंपादक यशवंत पाटील व दक्षिण गोवा ब्‍यूरो चीफ सुशांत कुंकळयेकर यांचाही यावेळी सन्मान करण्यात आला. अलेक्झांडर मोनिझ बार्बोझा, रामनाथ पै रायकर आणि प्रदीप पाटील यांना गौरविण्‍यात आले.