पणजी: गोवा विद्यापीठात गोमंतकीय प्राध्यापकांचा भरणा असल्याने विद्यापीठाचे मानांकन कमी होत असल्याचे कुलगुरू हरिलाल मेनन यांचे विधान चुकीचे असून गोवा विद्यापीठातील प्रत्येकाचे संशोधन, शैक्षणिक, सामाजिक बांधिलकी आदी सर्वंकष मूल्यांकन करणे गरजेचे असल्याचे मत दिनार भाटकर यांनी व्यक्त केले. ते ‘गोमन्तक टीव्ही’वरील संपादक-संचालक राजू नायक यांच्या ‘सडेतोड नायक’ या कार्यक्रमात बोलत होते.

या चर्चेत शिक्षणतज्ज्ञ दिनार भाटकर, सुदिन नायक आणि गोवा विद्यापीठ कार्यकारी समितीचे सदस्य प्रसाद रांगणेकर उपस्थित होते. दरम्यान, जे विद्यार्थी ‘पीएचडी’ करतात त्यातील किमान १० टक्के ‘पीएचडी’ या गोव्‍यासंबंधित असायला हव्‍यात. खरे तर सद्यस्थितीत विद्यापीठात योग्य नेतृत्व आणि दृष्टिकोनाची कमतरता असल्याची खंत भाटकर यांनी व्यक्त केली.

गोवा विद्यापीठाच्या माध्यमातून गोमंतकीयांच्या हिताच्या गोष्टी झाल्या पाहिजेत. परंतु हेदेखील लक्षात घेतले पाहिजे की आता आमची स्पर्धा जागतिक स्तरावर आहे. त्यामुळे गोवा विद्यापीठात प्रशासकीय कर्मचाऱ्यांची भरती करताना तेथे केवळ गोमंतकीयांनाच प्राधान्य देण्यात आले पाहिजे; परंतु नवीन अभ्यासक्रमात ज्याचे आपल्याकडे प्राध्यापक उपलब्ध नाहीत जसे की एआय, रोबोटिक्स अशावेळी नियमात शिथिलता करण्यास हरकत नाही.

परंतु ही नेमणूक करताना गोमंतकीयांचे हित आणि उत्कर्ष ध्यानात ठेवूनच नीरक्षीर पद्धतीने व्हावी आणि त्यासाठी एक विशेष समिती असावी. या शिथिलतेचा गैरफायदा मात्र कोणी घेता कामा नये, असे मत शिक्षणतज्ज्ञ सुदिन नायक यांनी व्यक्त केले.