केंद्रीय कामगार ब्‍युरोने गोव्‍यातील बेरोजगारीची आकडेवारी नुकतीच जाहीर केली. आकडेवारी जाहीर होताच राजकीय राळ उडाली. विरोधकांनी वाढत्या बेरोजगारीच्या मुद्यावरुन सरकारला घेरण्याचा प्रयत्न केला. तर दुसरीकडे, केंद्रीय कामगार ब्‍युरोने गोव्‍यातील बेरोजगारीची दिलेली आकडेवारी पूर्णपणे चुकीची आहे आणि आम्ही ती स्वीकारत नाही, असे म्हणत कामगारमंत्री बाबूश मोन्सेरात यांनी सरकारची बाजू मांडली. सदर अहवाल जाहीर होण्‍यापूर्वीच गोव्‍याने आक्षेप नोंदवूनही केंद्राने दखल न घेतल्‍याने कामगार खाते तोंडघशी पडले आहे. केंद्रीय कामगार ब्‍युरोने जाहीर केलेल्या आकडेवारीत गोव्‍यातील बेरोजगारीची टक्केवारी 8.7 टक्के दाखवली आहे. मोन्सेरात पुढे म्‍हणाले की, गोव्याच्या कामगार विभागाकडून ही आकडेवारी देण्‍यात आलेली नाही. केंद्रीय पातळीवरुन जाहीर झालेली बेरोजगारीची आकडेवारी आम्‍ही स्वीकारत नाही.