पणजी: गोव्यात यंदाच्या वर्षांपासून नवीन शैक्षणिक धोरणाची अंमलबजावणी केली जाणार आहे आणि म्हणूनच यंदाच्या वर्षी एप्रिल महिन्यात शाळा सुरु करण्याचा निर्णय घेण्यात आला होता. या निर्णयाला अनेक पालकांकडून विरोध सुद्धा झाला मात्र शिक्षण संचालनाने शाळा सुरु करण्यासाठी एप्रिल ७ हीच तारीख पक्की केली असल्याची माहिती शिक्षण खात्याचे संचालक शैलेश झिंगडे यांनी माध्यमांना दिली.

एप्रिल महिन्यात शाळा सुरु केल्यास मुलांना गरमीचा त्रास सहन करावा लागेल आणि म्हणून शाळा सुरु करण्याचा हा प्रस्ताव मागे घ्यावा अशी विनंती काही पालकांनी केली होती, मात्र मुलं घरी देखील घरात बसून राहणार नाहीत, ती बाहेर जाऊन खळणाराच आहेत. विद्यार्थ्यांना उन्हाळ्याचा काहीही त्रास होणार नाही आणि झालाच तर त्यानं ११-११:३० पर्यंत घरी सोडलं जाईल अशी माहिती शैलेश झिंगडे यांनी दिलीये.

विद्यार्थ्यांना आवश्यक असणारी पुस्तकं उपलब्ध करून दिली जातील आणि यंदाचे शैक्षणिक वर्ष एप्रिल महिन्यात सुरु केल्यास काहीच प्रश्न निर्माण न होण्याचे आश्वासन झिंगडे यांनी दिलंय. १ मे ते ३ जून पर्यंत विद्यार्थ्यांना उन्हाळ्याची सुट्टी सुद्धा दिली जाणार आहे.