गोव्यात गेल्या आठ ते दहा दिवसांपासून पावसाची संततधार सुरु आहे. पावसामुळे राज्यातील जनजीवन विस्कळीत झाले असून, अनेक ठिकाणी पडझडीच्या घटना सुरु आहेत. फातोर्डात बुधवारी भिंत कोसळून एका अठरा वर्षीय युवकाचा मृत्यू झाला होता. त्यानंतर गुरुवारी देखील पावसाचा जोर कायम असून, कुठे रस्ता खचला आहे तर कुठे दरड कोसळण्याची घटना समोर आली आहे.

अनमोड घाटात दरड कोसळल्याने कर्नाटक आणि महाराष्ट्रात जाणारा मार्ग वाहतुकीसाठी बंद झाला. तर वाळपई व सत्तरी तालुक्यात मुसळधार पाऊस झाल्याने काही ठिकाणी पाणी साचल्याने वाहतूक बंद झाली.