पणजी: गोव्यातील ऐतिहासिक वास्तु, संस्कृती, परंपरा, लोककला आदी अबाधित राखण्यासाठी गोवा वारसा धोरण लवकरच अमलात येईल. गावात ज्या वास्तू, मूर्ती, इतर ऐवज व लोप पावणारी लोककला त्यांचे संवर्धन करण्यात येईल, असे पुराभिलेख, पुरातत्वमंत्री सुभाष फळदेसाई यांनी सांगितले.

मंत्रालयात आयोजित पत्रकार परिषदेत फळदेसाई बोलत होते. यावेळी सचिव प्रसाद लोलयेकर, संचालक नीलेश फळदेसाई व पुराभिलेख खात्याचे अधिकारी बालाजी शेणवी उपस्थित होते. फळदेसाई म्हणाले की, हे वारसा धोरण पाच वर्षांसाठी राबविण्यात येणार असून गरज भासल्यास पाच वर्षानंतर योग्य ते बदल करण्यात येणार आहेत. ऐतिहासिक वास्तु व इतर गोष्टी खासगी मालकीच्या आहेत, त्यांच्या मालकी हक्कावर कोणत्याही प्रकारचा दगा न आणता त्यांचे संवर्धन करून महसूल तसेच पर्यटन वाढीसाठी प्रयत्न केला जाणार असल्याचे त्यांनी सांगितले.