डिचोली परिसरात रानात नैसर्गिकरीत्या उगवणाऱ्या अळंब्यांचे अखेर दर्शन होऊ लागले असून, बाजारात त्यांची आवक सुरू झाली आहे. मात्र, यंदा पावसाचा जोर अपेक्षेइतका नसल्याने अळंब्यांचे उत्पादन कमी झाले आहे. त्यामुळे बाजारात अळंब्यांचा दर चांगलाच वाढला असून, एका वाट्याची किंमत सध्या 800 ते 1,000 रुपयांपर्यंत पोहोचली आहे.

पावसाच्या प्रमाणावर अळंब्यांचे उत्पादन पूर्णपणे अवलंबून असल्याने मुसळधार आणि सातत्यपूर्ण पाऊस झाल्यानंतरच त्यांची आवक वाढण्याची शक्यता व्यक्त आहे. सध्या कमी प्रमाणातील उपलब्धतेमुळे अळंब्यांना ग्राहकांकडून मोठी मागणी असून, पावसाचा जोर वाढल्यास पुढील काही दिवसांत दरात काहीशी घट होण्याची शक्यता आहे.