Youtuber आणि पत्रकार असणाऱ्या रोहित उपाध्याय याने गोवा सरकारच्या भ्रष्टाचाराबाबत केलेल्या विविध व्हिडिओमुळे तो अडचणीत सापडला आहे. गोवा सरकारची बदनामी केल्याबाबत गुन्हे शाखेचे पोलिस त्याचा हरियाणा आणि दिल्लीत शोध घेत आहेत.

काही सोशल मिडिया इन्फ्युएन्सर गोव्याची बदनामी करत असल्याचा आरोप केला जात असून, याविरोधात गोवा पोलिसांच्या गुन्हे शाखेने मोहीम उघडली आहे.

याप्रकरणी आता Youtuber रोहित उपाध्याय याने स्पष्टीकरण दिले आहे. मला अटक करण्यासाठी तुम्ही कशाला येताय? मी गोव्यात येतो विनाकरण करदात्यांचे पैसे खर्च करु नका, असे रोहितने म्हटले आहे.

रोहितने मुख्यमंत्री प्रमोद सावंत यांनी भ्रष्टाचाराच्या आरोपावर स्पष्टीकरण देणारी एखादी मुलाखत द्यावी, असे आवाहन देखील त्याने केले आहे.

पत्रकार असल्याचा दावा करणाऱ्या रोहित उपाध्यायने अलिकडेच गोवा सरकारचा विविध भ्रष्टाचारावर एक व्हिडिओ प्रसिद्ध केला होता. यात रोहितने विधानसभा अधिवेशनातील संदर्भाचा दाखला देत, गोव्यात झुवारी जमीन प्रकरणात ५० हजार कोटींचा घोटाळा झाल्याचा आरोप केला.

शिवाय ४० लाखांचे लाडू आणि व्हिआयपी लोकांच्या दळणवळणात वारेमाप खर्च झाल्याचे या व्हिडिओत म्हटले आहे. यावरुन गोवा पोलिसांच्या गुन्हे शाखेच्या वतीने त्याचा शोध घेतला जात आहे.

याप्रकरणी माहिती मिळाल्यानंतर रोहितने पत्रकारिता गुन्हा नसल्याचे म्हणत त्याने इंस्टाग्रामद्वारे मुख्यमंत्री सावंतांना मुलाखत देण्याचे आवाहन केले आहे.