धारबांदोडा परिसरात भीषण रस्ते अपघात घडला. यामध्ये एक दुचाकीस्वार गंभीर जखमी झाला. हा अपघात एका वेगाने येणाऱ्या टेम्पो आणि दुचाकीमध्ये झाला. मिळालेल्या माहितीनुसार, धारबांदोडा येथील मुख्य रस्त्यावर दुचाकी आणि टेम्पोची समोरासमोर जोरदार धडक झाली. ही धडक इतकी भीषण होती की, दुचाकीचे मोठ्या प्रमाणावर नुकसान झाले असून दुचाकीस्वार रस्त्यावर फेकल्या गेल्याने गंभीर जखमी झाला. अपघातानंतर स्थानिक नागरिकांनी तातडीने धाव घेत जखमीला उपचारासाठी जवळच्या रुग्णालयात दाखल केले. अपघाताची माहिती मिळताच पोलिसांनी घटनास्थळी धाव घेऊन पंचनामा केला. टेम्पो चालकाच्या निष्काळजीपणामुळे हा अपघात झाला की अन्य काही कारणास्तव, याचा तपास सध्या पोलीस करत आहेत. या अपघातामुळे परिसरात काही काळ वाहतुकीची कोंडी झाली होती.