पणजी: दै. ‘गोमन्तक’ने गोव्‍यात लेखनाची समृद्ध परंपरा सुरू केली. साहित्यिकांना उत्तेजन, प्रोत्‍साहन देण्‍याचे कार्य केले. कथा, कविता व इतर वैचारिक साहित्याच्या प्रांतात अनेक नवनवीन लेखक घडविले, असे प्रतिपादन प्रख्यात साहित्यिक विश्राम गुप्ते यांनी केले.

दै. ‘गोमन्तक’च्‍या दिवाळी अंक प्रकाशन सोहळ्यात गुप्‍ते बोलत होते. यावेळी गोवा चेंबर ऑफ कॉमर्सच्या अध्यक्षा तथा उद्योजिका प्रतिमा धोंड, डॉ. अजय वैद्य, गोमन्तकचे संपादक-संचालक राजू नायक, व्यवस्थापक विजू पिल्लई व मान्यवर उपस्थित होते.

प्रतिमा धोंड म्हणाल्या, गोव्यातील जवळपास प्रत्येकाच्‍या घरात ‘गोमन्तक’ वाचला जातो. मीसुद्धा ‘गोमन्तक’ आणि दिवाळी अंकाची कायमस्‍वरूपी वाचक आहे. डॉ. अजय वैद्य म्हणाले, ‘गोमन्तक’च्या पहिल्या दिवाळी अंकापासूनचा मी त्‍याचा वाचक आहे. ‘गोमन्तक’ने दिवाळी अंकाच्या माध्यमातून अनेक नवनवीन लेखकांना लेखनाची संधी दिली.