दक्षिण गोवा जिल्हाधिकारी कार्यालयातील लोअर डिव्हिजन क्लर्क (LDC) पदांच्या भरती प्रक्रियेत भ्रष्टाचार झाल्याचा गंभीर आरोप गोवा फॉरवर्ड पक्षाचे अध्यक्ष आणि फातोर्डाचे आमदार विजय सरदेसाई यांनी केला आहे. या आरोपानंतर सरदेसाई आणि महसूल मंत्री बाबुश मोन्सेरात आमने-सामने आले आहेत. सरदेसाईंच्या आरोपांवर आता बाबुश यांनी खुले आव्हान दिले आहे. विजय सरदेसाई हे माझे चांगले मित्र आहेत. मी आजपर्यंत कधीच नोकऱ्यांच्याबाबतीत लुडबुड केलेली नाही. नोकऱ्यांच्या बदल्यात पैशांची मागणी झाल्याचा आरोप सरदेसाई यांनी केला आहे. अशी हवेत वक्तव्ये करण्यापेक्षा सरदेसाई यांनी पुराव्यासह स्पष्ट करावे. मीही याआधी नोकऱ्यांसाठी पैशांच्या देवाण घेवाणीचा आरोप केला होता, पण तो पुराव्यांसह, असे मंत्री बाबूश मोन्सेरात यांनी विजय सरदेसाईंच्या आरोपांवर प्रत्युत्तर दिले.