म्हापसा: कळंगुटमधील अनधिकृत व्यवसायांविरोधात स्थानिक पंचायतीने कारवाईचा बडगा उगारला आहे. ‘टिटोस्‌’ लेनजवळ चालणारा ‘ला फोंटाना’ हा क्लब सील करण्यात आला. संबंधित क्लब कोणत्याही वैध परवान्याशिवाय सुरू असल्याचे तपासात उघड झाले.

स्थानिक ग्रामस्थांकडून क्लबमध्ये संशयास्पद व बेकायदा हालचाली सुरू असल्याच्या तक्रारी सातत्याने येत होत्या. या पार्श्वभूमीवर कळंगुट पंचायतीचे सचिव अर्जुन वेळीप यांनी पोलिस बंदोबस्तात ही कारवाई केली.

गावातील शांतता व सुव्यवस्था राखण्यासाठी तसेच पर्यटकांची फसवणूक करणाऱ्या दलालांच्या साखळीवर आळा घालण्यासाठी ही कठोर पावले उचलण्यात येत असल्याचे पंचायत सदस्यांनी स्पष्ट केले.

दरम्यान, कळंगुट पंचायतीने या महिन्याच्या सुरुवातीपासून अनधिकृत व्यवसायांविरोधात विशेष मोहीम हाती घेतली आहे. यापूर्वीही अनेक बेकायदा टॅटू पार्लर व क्लब सील करण्यात आले आहेत. परवाना नसलेल्या किंवा नियमांचे उल्लंघन करणाऱ्या कोणत्याही व्यवसायाला थारा दिला जाणार नाही, असा इशारा प्रशासनाने दिला आहे