डिचोली : आंघोळीसाठी असुरक्षित मानल्या जाणाऱ्या वाठादेव-डिचोली येथील बंधाऱ्यात नौशाद बडीगर (४२) याचा बुडून मृत्यू झाला. मूळ कर्नाटकचा असलेला नौशाद मजुरीसाठी गोव्‍यातील न्यूवाडा-वाठादेव भागात वास्तव्यास होता. मद्यप्राशन करून तो बंधाऱ्यात उतरला असावा, असा प्राथमिक अंदाज व्यक्त करण्यात येत आहे. श्री महादेव मंदिरामागील बंधाऱ्यात मृतदेह तरंगत असल्याची माहिती मिळताच डिचोली अग्निशमन दलाने घटनास्थळी धाव घेऊन मृतदेह बाहेर काढून पोलिसांच्या ताब्यात दिला. पोलिसांनी पंचनामा करून मृतदेह गोमेकॉत पाठवून दिला. पुढील तपास सुरू आहे. नौशाद याच्या मागे पत्नी व दोन लहान मुले आहेत.