अनेक गुन्ह्यांत डिचोली पोलिसांना हवा असलेल्या आणि मागील दोन वर्षांपासून फरार असलेल्या सराईत गुन्हेगाराला अखेर अटक करण्यात यश मिळाले. सतीश गावस (रा. साखळी) असे या हिस्ट्रीशीटर गुन्हेगाराचे नाव आहे. दुबईहून परतताना मुबंई विमानतळावर या सराईत गुन्हेगाराला अटक करण्यात आली. मुंबई विमानतळ प्राधिकरणाच्या सहकार्याने डिचोली पोलिसांनी ही कारवाई केली. याच पाश्वभूमीवर आता डिचोली पोलिस स्थानकात सतीशविरोधात एफआयआर दाखल करण्यात आला आहे. दरम्यान, सतीशविरोधात पोलिस स्थानकात विविध नऊ गुन्ह्यांची नोंद आहे. तसेच ‘एनआय’ कायद्याच्या 138 कलमाखाली त्याच्या विरोधात वेगवेगळ्या न्यायालयात खटले चालू होते. मात्र, तो गेल्या दोन वर्षांपासून फरार होता. पोलिस त्याच्या मागावर होते. सतीश गावस याच्या विरोधात अजामीनपात्र अटक वॉरंट बजावण्यात आले होते.