डिचोली: डिचोली शहरातील अखेरच्या घटका मोजणारा आणि कोसळण्याच्या वाटेवर असलेला ''तो'' धोकादायक आम्रवृक्ष अखेर कापून जमीनदोस्त करण्यात आला आहे. आपत्कालीन व्यवस्थापनांतर्गत (मंगळवारी) हे झाड तोडण्यात आले. शहरातील छत्रपती शिवाजी महाराज मैदान आणि भर रस्त्याला टेकून असलेले जुनाट आंब्याचे झाड पूर्णपणे वाळून अत्यंत कमकुवत बनले होते. मुळातून हे झाड तर एकदम पोखरून गेले होते. त्यामुळे ते झाड कोणत्याही क्षणी कोसळण्याच्या वाटेवर होते. तशी भीतीही व्यक्त होत होती.

गेल्या महिन्यात ''गोमन्तक'' मधून या समस्येवर प्रकाश टाकण्यात आला होता. ज्याठिकाणी हे झाड उभे होते, तेथून दरदिवशी शेकडो वाहनांसह पादचाऱ्यांची ये-जा चालूच असते. रहदारीच्यावेळी हे झाड कोसळल्यास अनर्थ घडण्याची शक्यता नाकारता येत नव्हती. तशी भीतीही पादचारी आणि वाहनचालकांकडून व्यक्त होत होता. सदैव गजबजणाऱ्या मैदानाजवळील रस्त्यावर एखादी दुर्घटना घडण्यापूर्वीच हे धोकादायक झाड कापावे, अशी मागणी वाहनचालक आणि पादचाऱ्यांकडून होत होती. अखेर ''ते'' धोकादायक झाड कापल्यामुळे वाहनचालक आणि पादचाऱ्यांनी सुटकेचा श्वास घेतला आहे.