डिचोली येथे झालेल्या अपघातात २२ वर्षीय तरुणाचा उपचारादरम्यान मृत्यू झाला. तन्मय खरवत असे मृत तरुणाचे नाव असून, तो डिचोलीतील कुडचिरेची येथील रहिवासी होता. मिळालेल्या माहितीनुसार, ७ नोव्हेंबर रोजी पहाटे सुमारे २ वाजण्याच्या सुमारास तो बोर्डे येथील जिममध्ये जाऊन घरी परतत होता. यावेळी त्याचा दुचाकीवरून स्वतःचा तोल जाऊन अपघात झाला. या अपघातात तन्मय गंभीर जखमी झाला होता.

अपघातानंतर त्याला तातडीने उपचारासाठी गोवा वैद्यकीय महाविद्यालय (GMC), बांबोळी येथे दाखल करण्यात आले. मात्र, उपचार सुरू असतानाच त्याची प्राणज्योत मालवली. या घटनेमुळे कुडचिरेम परिसरात हळहळ व्यक्त होत आहे. दरम्यान, डिचोली पोलिसांनी या प्रकरणी अनैसर्गिक मृत्यूची (UD) नोंद केली असून, अपघाताचा पुढील तपास सुरू केला आहे.