सासष्टी: गोव्यात सिनेमाचे चित्रिकरण करण्यास वाव आहे. आपण अजूनही चित्रपट सृष्टीत आहे व त्याच निमित्ताने गोव्याला भेट दिली आहे. आपल्याला येथे काही सिनेमांचे चित्रिकरण करायचे आहे तसेच येथे लहान मुलांसाठी फिल्म अकादमी सुरू करण्याची इच्छा आहे, असे सिनेसृष्टीतील सुप्रसिद्ध अभिनेत्री जया प्रदा यांनी मडगावात सांगितले.

मंगळवारी (ता.१५) जया प्रदा यांनी माजी राज्यसभा खासदार विनय तेंडुलकर यांच्यासह रवींद्र भवनला भेट दिली. रवींद्र भवनच्या परिसराची पाहणी केली व फातोर्डा भाजप महिला मोर्चाच्या पदाधिकारी व सदस्यांशी चर्चा केली. दरम्यान, जया प्रदा यांनी बायणातील रवींद्र भवनालाही भेट दिली.