आपल्या वेगळ्या कथनशैलीने प्रेक्षकांवर ठसा उमटवणारे दिग्दर्शक विशाल भारद्वाज पुन्हा चर्चेत आले आहेत. अजय देवगण, सैफ अली खान आणि शाहिद कपूर यांच्यासोबत कल्ट चित्रपट देणाऱ्या विशाल यांनी अद्याप बॉलिवूडचा ‘बादशाह’ शाहरुख खान यांच्यासोबत काम केलेले नाही, ही बाब चाहत्यांना नेहमीच खटकत आली आहे.

सध्या त्यांचा 'ओ रोमिओ' हा चित्रपट प्रदर्शित झाल्याने ते प्रमोशनमध्ये व्यस्त आहेत. याच दरम्यान एका मुलाखतीत त्यांना शाहरुख खानसोबत काम करण्याबाबत प्रश्न विचारण्यात आला. त्यावर त्यांनी सकारात्मक प्रतिक्रिया देत सांगितले की, “असं होणं गरजेचं आहे. मी वर्षातून अनेकदा शाहरुखला विविध कथांसाठी संपर्क करतो. तो नेहमी माझ्या संदेशांना प्रतिसाद देतो. तो अत्यंत नम्र आणि आकर्षक व्यक्तिमत्त्व आहे.”

विशाल यांनी खुलासा केला की ‘ओ’रोमिओ’च्या निर्मितीदरम्यानही त्यांनी शाहरुखला एका नव्या चित्रपटाची कथा पाठवली आहे. “प्रत्येकाला शाहरुख आवडतो. त्याच्यात काहीतरी खास आहे, जे त्याला शाहरुख खान बनवतं. आमच्यात एक चित्रपट व्हायलाच हवा,” असे ते म्हणाले.

चाहत्यांसाठी ही मोठी आनंदाची बातमी मानली जात आहे. विशाल भारद्वाज आणि शाहरुख खान यांची जोडी मोठ्या पडद्यावर कधी झळकणार, याची उत्सुकता आता अधिकच वाढली आहे.