अयोध्या: भारतीय क्रिकेट संघाचा स्टार खेळाडू विराट कोहली आणि त्याची पत्नी, अभिनेत्री अनुष्का शर्मा यांनी अलीकडेच अयोध्येला आध्यात्मिक भेट दिली. यावेळी या दोघांनी हनुमानगढी मंदिरात विशेष पूजा-अर्चा केली. सोशल मीडियावर या जोडप्याचे पूजाविधींमध्ये सहभागी झाल्याचे फोटो आणि व्हिडिओ मोठ्या प्रमाणात व्हायरल होत आहेत.

अयोध्या दौऱ्यादरम्यान, विराट आणि अनुष्काने महंत ज्ञान दास यांचे आध्यात्मिक उत्तराधिकारी आणि संकट मोचन सेनेचे राष्ट्रीय अध्यक्ष संजय दत्त यांची भेट घेतली. हनुमानगढीचे वरिष्ठ पुजारी हेमंत दास यांनी त्यांना मंदिरातील पूजाविधी आणि इतर आध्यात्मिक कार्यक्रमांमध्ये मार्गदर्शन केले.

अध्यात्मिक श्रद्धेचा भाग

विराट आणि अनुष्का त्यांच्या खोलवर रुजलेल्या आध्यात्मिक श्रद्धेसाठी ओळखले जातात. या वर्षाच्या सुरुवातीलाही त्यांनी वृंदावनमध्ये प्रेमानंद महाराज यांची भेट घेतली होती. ही भेट विराटने कसोटी क्रिकेटमधून निवृत्ती जाहीर केल्यानंतर लगेचच झाली होती, जिथे त्याने १४ वर्षांच्या आपल्या चमकदार कसोटी कारकिर्दीला पूर्णविराम दिला होता.

निवृत्तीचा निर्णय एप्रिलमध्येच निश्चित

या दौऱ्यासोबतच विराट कोहलीच्या कसोटी क्रिकेटमधील निवृत्तीबाबत एक महत्त्वपूर्ण खुलासा समोर आला आहे. टीम इंडियाचे मुख्य निवडकर्ता अजित आगरकर यांनी शनिवारी (२४ मे रोजी) एका पत्रकार परिषदेत याची पुष्टी केली.

विराटने अधिकृत घोषणा करण्यापूर्वीच कसोटी क्रिकेटमधून निवृत्ती घेण्याचा निर्णय पक्का केला होता, असे आगरकर यांनी सांगितले. "विराटने एप्रिलच्या सुरुवातीलाच आमच्याशी संपर्क साधला होता आणि कसोटी क्रिकेटमधून निवृत्त होण्याचा निर्णय घेतल्याचे सांगितले होते" असे आगरकर म्हणाले.

३६ वर्षीय विराट कोहलीने कसोटी क्रिकेटमधून निवृत्ती घेतली असली तरी त्याचा विक्रम अत्यंत प्रभावशाली आहे. २०११ मध्ये वेस्ट इंडिजविरुद्ध किंग्स्टन, जमैका येथे पदार्पण केल्यापासून, कोहलीने ११३ कसोटी सामन्यांमध्ये ९,२३० धावा केल्या आहेत. कसोटी क्रिकेटमध्ये भारतासाठी सर्वाधिक धावा करणाऱ्या खेळाडूंच्या यादीत तो चौथ्या स्थानावर आहे. त्याच्या या निर्णयामुळे अनेक चाहत्यांना धक्का बसला असला तरी, तो आता नव्या भूमिकेत क्रिकेटमध्ये आपले योगदान देणार आहे.