Urfi Javed Grandfather Photo: अभिनेत्री उर्फी जावेद तिच्या हटके फॅशन सेन्समुळे नेहमीच सोशल मिडियावर चर्चेत असते. अनेकदा उर्फी तिच्या सोशल मीडियावर अशा काही पोस्ट शेअर करते ज्यामुळे सगळेच हैराण होतात.

उर्फी जावेद ही लेखक-अभिनेते जावेद अख्तर यांची नात असल्याचे अनेकदा म्हटले गेले होते. काहींनी तर थेट उर्फीला देखील या संबंधित प्रश्न केले होते. पण आता स्वतः उर्फीनेच एक फोटो शेअर करत याचे उत्तर दिले आहे. यावेळी देखील उर्फीचा फनी अंदाज चाहत्यांना पाहायला मिळाला. आता उर्फीने तिच्या सोशल मीडियावर जावेद अख्तर यांच्यासोबतचा फोटो शेअर केला आहे.

मीडिया रिपोर्टनुसार उर्फी जावेद नुकतीच एका फॅशन शोच्या निमित्ताने दिल्लीत आली होती. जिथे तिची भेट ज्येष्ठ अभिनेते-लेखक जावेद अख्तर यांच्याशी झाली. उर्फीने इंस्टाग्रामवर जावेद अख्तरसह एक फोटो शेअर केला आहे. या फोटोमध्ये (Photo) उर्फीने निळ्या रंगाचा ड्रेस घातला आहे तर जावेद यांनी राखाडी रंगाचा ड्रेस परिधान केला आहे. या फोटोमध्ये दोघेही हसतांना दिसत आहेत. हा फोटो शेअर करताना उर्फी जावेदने एक मजेशीर कॅप्शन देऊन जावेद अख्तर यांचे कौतुकही केले आहे.

उर्फीने या फोटोला दिलेल्या कॅप्शनने सगळ्यांचेच लक्ष वेधून घेतले आहे. उर्फीने लिहिले की, ‘अखेर मी आज माझ्या आजोबांना भेटले. ते एक लीजेंड आहेत. त्यांच्यासोबत सेल्फी घेण्यासाठी बरेच लोक पहाटेपासून रांगेत उभे होते, पण त्यांनी कुणालाही नाही म्हटले नाही. सगळ्यांशी त्यांनी हसत हसत गप्पा मारल्या. ते खूप ग्रेट आहेत आणि त्यांना भेटून मला आनंद झाला.’

जावेद अख्तर हे उर्फी जावेदचे आजोबा असल्याचे अनेकदा बोलले जाते. स्वतः उर्फीने बऱ्याच वेळा यावर स्पष्टीकरण देखील दिले आहे. उर्फी आणि जावेद अख्तर यांच्यात कोणतेही नाते नाही. मात्र, तरीही सतत दोघांचे नाते जोडले जात असल्याने आता उर्फीने आपल्या हटके स्टाईलमध्ये उत्तर दिलं आहे.