बॉलीवूडमध्ये असे काही कलाकार आहेत जे त्यांच्या वैयक्तिक आयुष्याबद्दल सतत चर्चेत असतात. हेलन (Helen) यांनी 21 नोव्हेंबर रोजी त्यांचा 83 वा वाढदिवस साजरा केला. हेलन यांची गणना त्यांच्या काळातील सर्वोत्कृष्ट अभिनेत्रींमध्ये केली जात असे. 1981 मध्ये अभिनेत्रीने सलमान खानचे वडील सलीम खान (Salim Khan) यांच्याशी लग्न केले. सलमान खाननेही (Salman Khan) एकदा एका मुलाखतीदरम्यान याबाबत चर्चा केली होती

सलमान खानला आला होता राग

1990 मध्ये एका मुलाखतीदरम्यान सलमान खान म्हणाला होता की, माझ्यासाठी माझी आईच सर्वस्व आहे आणि यामागे दुसरे कोणतेही कारण असावे असे मला वाटत नाही. मी आईचा मुलगा आहे म्हणून मी माझ्या आईशी खूप चांगले आहे. मी त्यांना कधीही दुःखी पाहू शकत नाही. माझ्या वडिलांनी दुसरं लग्न केलं तेव्हा आईला खूप दुःख झालं होतं. जेव्हा ती माझ्या वडिलांच्या घरी येण्याची वाट पाहत असे तेव्हा मला खूप राग यायचा.

सलमान दहा वर्षांचा होता...

याच मुलाखतीत सलमान खान पुढे म्हणाला होता की, आई हळूहळू हे सत्य स्वीकारू लागली. यासोबतच पप्पांनी आम्हाला समजावून सांगितले की, त्यांचे आईवर खूप प्रेम आहे आणि ते नेहमी आपल्या सर्वांसोबत असतील. त्यावेळी तो फक्त दहा वर्षांचा होता, त्यामुळे हेलन यांना मान्य करायला वेळ लागला, असं सलमान खान म्हणाला होता. पण आता ती त्याच्या कुटुंबाचा एक भाग बनली आहे. सलमानच्या म्हणण्यानुसार, त्याचे कुटुंब बंद मुठीसारखे आहे, जेव्हा एकमेकांची गरज असते तेव्हा आम्ही सर्वजण उपस्थित असतो.