बॉलिवूड अभिनेता सलमान खानला पनवेलच्या फार्महाऊसवर साप चावला. ही बातमी समजल्यानंतर त्याचे चाहते नाराज झाले. सगळ्यांनाच सलमानची काळजी वाटत होती. मात्र त्यानंतर त्याला रुग्णालयात नेण्यात आले आणि आता तो पूर्णपणे बरा आहे. वाढदिवसानिमित्त सलमानने मीडियाशी संवाद साधला. त्यानंतर त्यांनी ही घटना सांगितली. पनवेल फार्म हाऊसवर दरवर्षी सलमान खान त्याचा वाढदिवस कुटुंब आणि मित्रांसोबत साजरा करतो. यावेळीही त्याने तेच केले. भाईजानने फार्म हाऊसच्या बाहेर येऊन मीडियाशी देखील संवाद साधला आणि साप चावल्याची संपूर्ण घटना सांगितली. तसेच त्यांच्या तब्येतीची माहिती देखील दिली.

सलमान खानला तीनदा साप चावला

एएनआयशी झालेल्या संवादात सलमान खानने (Salman Khan) सांगितले की, माझ्या खोलीत एक साप आला होता, जो पाहून मुले घाबरली, म्हणून मी त्याला काठीने बाहेर काढत होतो. तो पाठीवरून माझ्या हातावर आला. त्यानंतर मी त्याला बाहेर काढण्यासाठी दुसऱ्या हाताने त्याला पकडले. घराच्या कर्मचार्‍यांनी जेव्हा साप पाहिला तेव्हा त्यांना वाटले की हा साप (Snake) विषारी आहे, त्यानंतर सापाने मला एकदा नव्हे तर तीनदा चावला.

शनिवारी रात्री घडलेल्या या घटनेनंतर सलमानला तातडीने एमजीएम रुग्णालयात (Hospital) उपचारासाठी नेण्यात आले. तेथून रविवारी त्याला डिस्चार्ज देण्यात आला. सलमानने पुढे सांगितले की, त्यानंतर आम्ही हॉस्पिटलमध्ये गेलो. सापाला ही आम्ही सोबत घेऊन गेलो, तिथे आम्हाला समजले की तो विषारी नाही. तरीही मी 6 तास हॉस्पिटलमध्ये राहिलो आणि मला अँटी व्हेनमचे इंजेक्शन देण्यात आले. मी आता ठीक आहे.

सापाला मारले नाही

सलमान खानने सांगितले की मला बरे वाटत आहे आणि त्याने सापाला मारले नाही. मी परत आल्यावर आम्ही सापाला जाऊ दिले. माझी बहीण खूप घाबरली होती म्हणून मी तिच्यासाठी सापासोबत फोटो क्लिक केला. सापाशी मैत्री केली. त्यानंतर सलमान म्हणाला की, माझ्या बाबांनी विचारले काय झाले? साप जिवंत आहे का? म्हणून मी म्हणालो टायगर पण जिवंत आहे, सापही जिवंत आहे. सलमान खान आज त्याचा 56 वा वाढदिवस साजरा करत आहे. सोशल मीडियावर चाहते त्याला वाढदिवसाच्या शुभेच्छा देत आहेत.