रविवारी तामिळनाडूचे नवे मुख्यमंत्री म्हणून जोसेफ विजय यांनी शपथ घेतली. या सोहळ्याचे थेट प्रक्षेपण सुरू असताना मंचावर उपस्थित असलेल्या एका सुरक्षा अधिकाऱ्याने सर्वांचे लक्ष वेधून घेतले. हा अधिकारी हुबेहूब चेन्नई सुपर किंग्सचा (CSK) वेगवान गोलंदाज अंशुुल कंबोज याच्यासारखा दिसत होता. योगायोग म्हणजे, याच दिवशी दुपारी ३:३० वाजता चेन्नईचा लखनऊ सुपर जायंट्सविरुद्ध महत्त्वाचा सामना होता.

आर. अश्विनची 'गुगली' आणि सोशल मीडियावरील कल्ला

अंशुुल कंबोजशी साधर्म्य असलेल्या या पोलीस अधिकाऱ्याचा फोटो वाऱ्यासारखा पसरला. भारताचा दिग्गज फिरकीपटू आर. अश्विनने या संधीचा फायदा घेत कंबोजची फिरकी घेतली. अश्विनने 'X' (ट्विटर) वर पोस्ट करत म्हटले, "कर्तव्य नेहमीच श्रेष्ठ असते, पण आजच्या करो या मरो (CSK vs LSG) सामन्याच्या दिवशी हे जरा जास्तच झाले. अंशुुल, सामना दिवसा आहे, लवकर टॅक्सी पकड आणि चेपॉकवर पोहोच!"

अश्विनच्या या मिश्किल पोस्टनंतर चेन्नई सुपर किंग्सनेही यात उडी घेतली. कंबोज सराव करत असल्याचा व्हिडिओ शेअर करत, "काळजी करू नका, अंशुुल कंबोज इथेच आहे," असे स्पष्टीकरण देत चाहत्यांची करमणूक केली.

३.४० कोटी रुपयांना संघात सामील झालेला हरियाणाचा वेगवान गोलंदाज अंशुुल कंबोज यंदाच्या आयपीएल २०२६ चा शोध मानला जात आहे. आंतरराष्ट्रीय खेळाडूंच्या अनुपस्थितीत त्याने चेन्नईच्या गोलंदाजीची धुरा यशस्वीपणे सांभाळली आहे. त्याने आतापर्यंत १० सामन्यांत १७ बळी घेतले असून, पॉवरप्लेमध्ये ऋतुराज गायकवाडचा तो सर्वात विश्वासू गोलंदाज ठरला आहे.

या गमतीदार प्रकरणानंतर मैदानात उतरलेल्या चेन्नईने नाणेफेक जिंकून प्रथम गोलंदाजी करण्याचा निर्णय घेतला. पावसाच्या व्यत्ययामुळे ऋतुराजने हा निर्णय घेतल्याचे स्पष्ट केले. आता मंचावर 'दिसलेला' कंबोज मैदानात कशी कामगिरी करतो, याकडे सर्वांचे लक्ष लागले आहे.