'बाहुबली' द्वारे जगभरात ओळख मिळवणारा प्रभास आज त्याचा 43 वा वाढदिवस साजरा करत आहे. वाढदिवसानिमीत्त दिग्दर्शक ओम राऊत (Om Raut) यांच्या 'आदिपुरुष' (Adipurush) या चित्रपटाचे नवे पोस्टर शेअर केले आहे.

दाक्षिणात्य सुपरस्टार प्रभासच्या (Prabhas) वाढदिवसानिमीत्त ओम राऊतांनी त्यांच्या सोशल मीडियावर (Social Media) दमदार संदेश देत चित्रपटाचे नवे पोस्टर शेअर केले आहे. त्यांनी पोस्टर शेअर करत लिहिले, "मिळवूनी वानरसेना राजा राम प्रगटला. मर्यादा पुरुषोत्तम प्रभू श्रीराम.'' या पोस्टरमध्ये प्रभासनं मर्यादा पुरुषोत्तम प्रभू रामांच्या भूमिकेत दिसत आहे.

प्रभासबाबत बोलताना ओम राऊत म्हणाले, ''प्रभास हा आपल्या भूमिकेसाठी अत्यंत मेहनत घेणाऱ्या अभिनेत्यांपैकी एक आहे. हे पोस्टर त्याचेच एक उत्तम उदाहरण आहे.''

आदिपुरुष हा चित्रपट (Movie) 12 जानेवारी 2023 रोजी IMAX आणि 3D मध्ये प्रेक्षकांच्या भेटीला येणार आहे. या चित्रपटात प्रभासने राम ही भूमिका साकारली आहे. तर कृती सेनन ही सीता या भूमिकेतून आणि सैफ रावण या भूमिकेतून प्रेक्षकांच्या भेटीस येणार आहे. लक्ष्मणाची भूमिका अभिनेता सनी सिंह साकारत आहे. हिंदी, तामिळ, मल्याळम, कन्नड या भाषांमध्ये 'आदिपुरुष' चित्रपट रिलीज होणार आहे.