Javed Akhtar: लखनौमधील लुलू मॉल उद्घाटन झाल्यापासून वादाच्या भोवऱ्यात सापडला आहे. यातच आता प्रसिध्द गीतकार जावेद अख्तरही या वादाच्या भोवऱ्यात आले आहेत. त्यांनी लखनौ पोलीस आयुक्तालयाची बनावट प्रेस रिलीज आपल्या ट्विटर हॅंडलवर शेअर केली आहे. नमाज अदा केल्यानंतर पोलिसांनी चार मुस्लिमांना अटक केली होती. त्यानंतर त्यांची सुटकाही केली. जावेद अख्तर यांनी शेअर केलेल्या प्रेस रिलीजमध्ये चारपैकी तीन नावे सरोज, कृष्णा आणि गौरव हिंदू आहेत.

दरम्यान, जावेद अख्तर (Javed Akhtar) यांच्या ट्विटर हँडलवर बनावट रिलीज पाहून लोक चांगलेच संतापले. प्रभात उपाध्याय या यूजर्सने लिहिले की, 'जावेद अख्तर जी, आरोपींची योग्य नावे पुढीलप्रमाणे आहेत. मोहम्मद रेहान, आतिफ खान, मुहम्मद लोकमान आणि मोहम्मद नोमान. तुम्ही तथ्यांची तपासणी केली नाही.' जावेद अख्तर यांना टॅग करत, पोलिसांची (Police) मूळ प्रेस रिलीजही उपाध्याय यांनी सोशल मीडियावर शेअर केली.

दुसरीकडे, एम श्रीवास्तव नावाच्या युजरने लिहिले की, 'कृपया त्यांना योग्य माहिती द्या. दिशाभूल करणाऱ्या बातम्या पसरवल्या जात आहेत.'