मुंबई : अभिनेता-निर्माता सचिन जोशी याला मुंबईतील विशेष पीएमएलए न्यायालयाने मनी लॉन्ड्रिंग प्रकरणात काही अटीं आणि शर्तींसह जामीन मंजूर केला आहे. 'जॅकपॉट' सारख्या काही चित्रपटात काम केलेल्या सचिन जोशीला गेल्या वर्षी १४ फेब्रुवारीला अंमलबजावणी संचालनालयाने (ईडी) अटक केली होती. 37 वर्षीय सचिन जोशी अभिनयासोबतच व्यवसाय देखील करतो आणि सध्या तो प्रकृतीच्या कारणामुळे सर्वोच्च न्यायालयाकडून अंतरिम जामिन घेऊन बाहेर आला आहे. सचिन जोशी यांच्यावर, त्याच्या कंपनीमार्फत 410 कोटी रुपयांच्या कर्जासाठी मनी लाँड्रिंग करण्यात आल्याचा आरोप ईडीने केला होता. तर त्यांच्या तपासात लाँड्रिंग करण्यात आल्याचे समोर आल्याचा दावाही ईडीने केला आहे. या प्रकरणी सचिन जोशी, ओंकार रियल्टर आणि डेव्हलपर्सचे अध्यक्ष कमल किशोर आणि व्यवस्थापकीय संचालक बाबूलाल वर्मा यांनाही अटक करण्यात आली होती. सध्या सचिनशिवाय दोघेही तुरुंगात आहेत. (Court grants bail to Sachin Joshi in money laundering case)

सचिनला (Actor-producer Sachin Joshi) जामीन मंजूर करताना विशेष न्यायाधीश एम जी देशपांडे यांनी ३० लाख रुपयांचा जातमुचलक आणि तेवढ्याच रकमेच्या जामीन (personal bond) देण्याचा आदेश दिला आहे. तसेच त्याला पुढील आदेशापर्यंत देश सोडता येणार नाही. तर पासपोर्ट ही ईडीकडे (Enforcement Directorate) जमा करावा लागेल. या प्रकरणाच्या तपासात (investigation) अडथळा येईल असे कोणतेही काम सचिनने करू नये, तसे करणे हा देखील गुन्हा मानला जाईल, असे न्यायालयाने सचिनला सांगितले आहे.

तर या जामीनाला विरोध करताना ईडीच्या (ED) वकील कविता पाटील यांनी कोर्टाकडे (court) तीन आठवड्यांचा अवधी मागितला. तसेच या आदेशाला स्थगिती देण्याची मागणी केली होती. मात्र, न्यायालयाने त्यांची मागणी फेटाळून लावत, तपास यंत्रणा अद्याप गुन्ह्यात त्याचा सहभाग सिद्ध करू शकलेली नाही असे न्यायालयाने म्हटले आहे.