Neuralink Brain Chip Implant: बॉलीवूड अभिनेत्री कंगना रणौत आपल्या अभिनयापेक्षा आपल्या वादग्रस्त वक्तव्यांमुळे अनेकदा चर्चेत असते. आता तिने इलॉन मस्क यांच्या न्यूरालिंक कॉर्प यांच्या मानवी मेंदूत चिप बसवल्याच्या घोषणेनंतर मोठे वक्तव्य केले आहे. अभिनेत्रीने इलॉन मस्क यांच्या पोस्टला उत्तर देताना त्यांचे कौतुक केले आणि या प्रयोगाची तुलना सतीयुगाबरोबर केली आहे. सतीयुगात हे तंत्रज्ञान आपल्या ऋषींकडे आधीच होते अशा आशयाची सोशल मिडीयावर पोस्ट शेअर केली आहे.

समोर आलेल्या माहितीनुसार, इलॉन मस्क यांनी सोशल मिडिया हँडल एक्स ( ट्विटर ) वर न्यूरालिंक कॉर्प या कंपनीकडून माणसाच्या मेंदूत चीप बसवण्याच्या महत्वाकांक्षी प्रोजेक्टबद्दल पोस्ट शेअर केली होती. ही चीप मेंदूमध्ये बसवल्यानंतर माणूस आपल्या मेंदूद्वारेच कॉम्पुटर किंवा मोबाईल चालवू शकणार असल्याचं म्हटले आहे. हा प्रयोग यशस्वी झाला तर त्याचा फायदा ज्यांनी आपले अवयव गमावले आहेत, जे अपंगत्वाचा सामना करत आहेत त्यांना या तंत्रज्ञानाचा फायदा होणार आहे.

कंगना आपल्या पोस्टमध्ये म्हणते- "सतयुग मुख्यत्वे या तंत्रज्ञानामुळे म्हणजेच न बोलता संवाद साधण्याच्या क्षमतेमुळे लक्षात राहतो. देव, ऋषी आणि इतर अनेक प्राणी आपल्या ग्रंथांमध्ये ज्या तंत्रांचा वापर करतात ते आपण आपल्या आयुष्यात पाहिले तर कल्पना करणे अशक्य नाही. नास्तिकांसाठी सर्वात मोठे आव्हान म्हणजे त्यांनी जे पाहिले किंवा ऐकले नाही ते समजून घेणे, कारण ते आपल्या धर्मग्रंथात लिहिलेल्या प्रत्येक गोष्टीला खोटे मानतात."

कंगनाच्या या पोस्टनंतर नेटकऱ्यांनी मजेशीर कंमेट केल्या आहेत. एका युजरने म्हटले आहे की, आज इलॉन मस्कला शांत झोप लागू दे. दुसऱ्या एका युजरने म्हटले आहे की, तू या प्रयोगासाठी उत्तम आहेस कमीत कमी तुझ्या मेंदूत ही चीप बसवल्यानंतर तू काहीतरी योग्य आणि विचार करुन बोलशील.

दरम्यान, मानवी मेंदूत चीप बसवण्याचा प्रयोग ऐतिहासिक आणि महत्वपूर्ण मानला जात आहे. कारण यामुळे ज्यांना हात किंवा पायाचे अपंगत्व आहे किंवा ज्यांनी आपले हात-पाय गमावले आहे त्यांच्यासाठी हे वरदान ठरणार असल्याचे म्हटले जात आहे.