बॉलिवूड अभिनेता अर्शद वारसीने अलीकडेच शाहरुख खानच्या ‘किंग’ चित्रपटात आणि आर्यन खानच्या दिग्दर्शनातील पदार्पण प्रोजेक्टमध्ये काम करण्यामागचे कारण स्पष्ट केले आहे. स्क्रिप्टपेक्षा खान कुटुंबाशी असलेले नाते आणि मैत्री हेच आपल्या निर्णयामागचे प्रमुख कारण असल्याचे त्याने सांगितले.

अर्शदने सांगितले की, आर्यन खानने भूमिका ऑफर करताच त्याने कोणताही विलंब न लावता होकार दिला. “मी आर्यनसाठी केलं आणि ‘किंग’साठी केलं कारण मला आर्यन आणि शाहरुख आवडतात. ते लोक मला आवडतात. त्यांनी विचारलं तर मी नक्की करेन,” असे स्पष्ट शब्दांत त्याने म्हटले.

आर्यन खानच्या दिग्दर्शनातील पहिल्या प्रोजेक्ट ‘द बास्टर्ड्स ऑफ बॉलिवूड’मध्ये अर्शदने अंडरवर्ल्ड डॉन गफूर इस्माईलची भूमिका साकारली. नेटफ्लिक्सवरील या मालिकेत त्याच्या विनोदी टायमिंगचे विशेष कौतुक झाले. या मालिकेत लक्ष्य, सहर बंबा, अन्या सिंग, रजत बेदी, मोना सिंग, राघव जुयाल आणि बॉबी देओल यांनीही महत्त्वाच्या भूमिका साकारल्या आहेत. तर इमरान हाश्मी आणि शाहरुख खान यांची खास केमिओ उपस्थितीही पाहायला मिळाली.

अर्शद वारसीच्या या वक्तव्यामुळे बॉलिवूडमध्ये मैत्री आणि वैयक्तिक नात्यांना किती महत्त्व दिले जाते, याची पुन्हा एकदा चर्चा रंगली आहे.