Ameesha Patel: सनी देओल आणि अमिषा पटेल यांच्या गदर २ या चित्रपटाने बॉक्स ऑफीसवर धुमाकूळ घातला आहे. चित्रपटाने ५०० कोटींची कमाई करत सर्वांना आश्चर्यचकित केले आहे. गदर २ ची टीम हे यश साजरे करत असून चित्रपटाच्या निमित्ताने कलाकार पून्हा एकदा चर्चेत आले आहेत.

अमिषा पटेलने मोठ्या ब्रेकनंतर या चित्रपटातून बॉलीवूडमध्ये पदार्पण केले आहे. चित्रपटाच्या प्रमोशन आणि त्यानंतरच्या मुलाखतीत अभिनेत्रीने अनेक खुलासे केले आहेत. त्यामुळे सध्या अमिषा पटेल चर्चांचा भाग बनली आहे.

आता अमिषा पटेलने वयावरुन ट्रोल करणाऱ्यांना सडेतोड उत्तर दिले आहे. ती म्हणते तुमचे वय तुमच्या करिअरमध्ये कधीच अडथळा आणत नाही. वय फक्त आकडा आहे, ५० वर्षे सुद्धा २० वर्षासारखेच आहे.

तुमच्या प्रतिभेला कोणतीही सीमा नसते. याचे उदाहरण म्हणजे, सनी देओल ६५ वर्षांचे आहेत पण जेव्हा त्यांनी मुख्य भूमिकेत बॉलीवूड ( Bollywood )मध्ये पून्हा पदार्पण केले तेव्हा त्यांच्यासमोर सगळे फेल झाले. अमिषा पटेलचे वय सध्या ४७ वर्ष असून तिला अनेकदा तिच्या वयावरुन ट्रोल केले जाते. त्यावर तिने उत्तर दिले आहे.

पुढे बोलताना ती म्हणते, कलाकार कधीही अभिनय सोडत नसतात. ते ब्रेक घेतात. चांगले कलाकार कधीही अभिनयापासून दूर जात नाहीत.

दरम्यान 'गदर 2' ने बॉक्स ऑफिसवर इतिहास रचला आहे. 'पठाण'ने 50 दिवसांत 540.51 कोटींची कमाई केली होती, तर गदरने 24 दिवसांत 500 कोटींचा आकडा पार केला आहे. मात्र, आता शाहरुखचा 'जवान' ७ सप्टेंबरला प्रदर्शित होत असल्याने गदर २ साठीचा रस्ता कठीण होणार असल्याचे म्हटले जात आहे.