कोकणात वैभव नाईक (Vaibhav Naik) विरुद्ध राणे यांच्यातील वाद वाढताना दिसत आहे. ठाकरे गटाचे आमदार वैभव नाईक यांच्याविरोधात लाचलुचपत प्रतिबंधक विभागाने बेहिशोबी मालमत्ता प्रकरणी चौकशी सुरू केली आहे. या विरोधात नाईक यांनी कुडाळमध्ये मोर्चा काढला. यावेळी वैभव नाईक यांनी निलेश राणेंनी (Nilesh Rane) लोकशाहीच्या मार्गाने निवडणुकीत उभं राहून दाखवावे असं खुलं आव्हान दिलं आहे.

वैभव नाईक यांनी कोकणात काढलेल्या मोर्चात खासदार अरविंद सावंत, भास्कर जाधव यांनी उपस्थिती लावत, केंद्रीय मंत्री नारायण राणे यांच्यावर टीकास्त्र सोडले. यावेळी वैभव नाईक म्हणाले, "माझ्याकडे एक रुपया जरी बेहिशोबी असेल तर मला फासावर लटकवा असे माझे पोलिसांना आवाहन आहे. मला अटक करून मी भारतीय जनता पार्टी (BJP) किंवा राणें समोर झुकेन असे कोणाला वाटत असेल तर हे शक्य होणार नाही. राणेंच्या दबावाला आम्ही यापूर्वी भिक घातली नाही आणि यापुढेही घालणार नाही. "

वैभव नाईक पुढे म्हणाले, "2014 च्या निवडणूकीत नारायण राणेंचा (Narayan Rane) पराभव केला आता निलेश राणेंनादेखील पराभूत करू. आपण उद्धव ठाकरे यांची साथ सोडून जाणार नसल्याचेही त्यांनी स्पष्ट केले. हिम्मत असेल तर निलेश राणे (Nilesh Rane) यांनी (सन 2024) मध्ये आपल्या विरुद्ध निवडणूक लढवूनच दाखवावी." असे आव्हान राणे यांना दिले आहे.