कुलू-मनाली, हिमाचल प्रदेशात येथे पॅराग्लायडिंग करताना साताऱ्यातील युवकाचा मृत्यू झाला आहे. पॅराशूटचा बेल्ट निसटून युवक खाली पडला आणि त्याचा मृत्यू झाला. सूरज शहा (रा. शिरवळ, सातारा) असे या अपघातात मृत्यू झालेला युवकाचे नाव आहे. तो 30 वर्षांचा होता. या घटनेमुळे शिरवळ शहरावर शोककळा पसरली आहे. याशिवाय दुसऱ्या घटनेत दक्षिण कोरियातील व्यक्तीचा देखील मृत्यू झाला आहे.

(Suraj Shah From Shirwal Satara dies while Paragliding in Kullu-Manali)

मिळालेल्या माहितीनुसार, सुरज मित्रांसोबत तो ख्रिसमस आणि न्यू इयर सेलिब्रेशनसाठी कुलू-मनालीला गेला होता. सुरज सुमारे 800 फुटावरून खाली पडला असल्याचे सांगण्यात येते. डोभी येथून पॅराग्लायडिंगसाठी उड्डाण केल्यानंतर काही वेळेतच सूरजचा सेफ्टी बेल्ट खुला झाला. त्यानंतर तो खाली कोसळला. उपचारासाठी त्याला रूग्णालयात दाखल करण्यात आले मात्र, डॉक्टरांनी त्याला मृत घोषित केले.

पॅराशुट पायलटवर सदोष मनुष्यवधाचा गुन्हा

सूरजला सेफ्टी बेल्टची माहिती देण्यात आली होती, असे पॅराशुट पायलटने सांगितले. सूरजा हात वारंवार सेफ्टी बेल्टवर जात होता. त्यामुळे सेफ्टी बेल्ट उघडला. हाताच्या साहाय्याने सूरजला वाचवण्याचा प्रयत्न केला. मात्र, त्याचे वजन अधिक असल्याने त्याला वाचवता आले नाही. पॅराशुट पायलटवर सदोष मनुष्यवधाचा गुन्हा दाखल करण्यात आला आहे.