देशात आणि राज्यात दररोज वाढणाऱ्या पेट्रोल-डिझेलच्या (Petrol-diesel) किमती नवा उच्चांक गाठत आहेत. दुसरीकडे महागाईमुळे सर्वसामान्य नागरिकांचे जगणे कठीण बनले आहे. अशा अनेक कारणांमुळे राज्य परिवहन महामंडळाच्या (State Transport Corporation) लालपरीच्या तिकीटामध्ये पुन्हा एकदा सोमवारी मध्यरात्रापासून वाढ करण्यात आली आहे. मात्र या तिकीट दरवाढीचा फटका सर्वसामान्य नागरिकांना बसणार असल्याने त्यांच्या खिशाला पुन्हा कात्री लागणार आहे.

दरम्यान, राज्यात कोरोनामुळे (Covid 19) राज्य परिवहन महामंडळाची एसटी बससेवा ठप्प झाली होती. त्यामुळे महामंडळाला मोठा आर्थिक तोटा सहन करावा लागला होता. आता राज्य अनलॉक झाल्यानंतर एसटी पुन्हा एकदा हळूहळू पूर्वपदावर येत आहे. मात्र एसटी बस बंद झाल्याने उत्पन्नात मोठ्याप्रमाणात घट झाली होती. त्यामुळे तब्बल 12 हजार कोटी रुपयांचा तोटा सहन करावा लागला असताना वाढते पेट्रोल-डिझेलचे दर, टायरचे दर, कर्मचाऱ्यांचे वेतन अशा अनेक कारणांमुळे महमंडळ आर्थिक कोंडीत सापडले आहे. त्यामुळे राज्य प्रशासनाकडून 17 ते 20 टक्‍क्‍यांपर्यंत तिकीटाच्या दरामध्ये वाढ होणार असल्याचे सांगितले आहे.