Sharad Pawar Resigns As NCP Chief: महाराष्ट्रातील राजकीय गोंधळाच्या पार्श्वभूमीवर राष्ट्रवादी पक्षाचे अध्यक्ष आणि ज्येष्ठ राजकारणी शरद पवार यांनी पक्षाच्या अध्यक्षपदाचा राजीनामा देण्याचा निर्णय घेतला आहे.

'लोक माझे सांगाती' या पुस्तक प्रकाशन सोहळ्यात त्यांनी हा मोठा निर्णय घेतला. त्यांनी पुढील निवडणूक लढवणार नसल्याची माहिती दिली.

अध्यक्षपद सोडल्याच्या वृत्ताने राष्ट्रवादीत खळबळ उडाली आहे. या निर्णयाचा फेरविचार करावा, असे आवाहन पक्षाचे कार्यकर्ते करत आहेत. जून 1999 मध्ये काँग्रेसपासून फारकत घेऊन पवारांनी राष्ट्रवादी काँग्रेसची स्थापना केली.

पवार यांनी आपल्या भाषणादरम्यान बोलताना सांगितले की, "राज्यसभा सदस्य म्हणून माझ्याकडे संसदेत तीन वर्षे शिल्लक आहेत, त्या काळात मी महाराष्ट्र (Maharashtra) आणि देशाशी संबंधित विषयांवर लक्ष केंद्रित करेन. कोणत्याही प्रकारे जबाबदारी घेणार नाही.'

MVA च्या निर्मितीमध्ये मोठी भूमिका बजावली

चार वेळा महाराष्ट्राचे मुख्यमंत्री, संरक्षण आणि केंद्रीय कृषी मंत्री म्हणून काम केलेल्या पवारांनी 2019 च्या महाराष्ट्र विधानसभा निवडणुकीनंतर महाविकास आघाडी (MVA) सरकार स्थापन करण्यासाठी राष्ट्रवादी काँग्रेस, काँग्रेस (Congress) आणि वैचारिकदृष्ट्या भिन्न असलेल्या शिवसेनेला एकत्र आणले. आता पवारांच्या राजीनाम्याची घोषणा झाल्यानंतर एमव्हीएच्या भवितव्यावर प्रश्नचिन्ह निर्माण झाले आहे.

'सार्वजनिक जीवनातून निवृत्त होत नाही'

पवार पुढे आपल्या भाषणादरम्यान म्हणाले की, 'मी अध्यक्षपदावरुन पायउतार होत असलो तरी सार्वजनिक जीवनातून निवृत्त होत नाही. 'सतत प्रवास' हा माझ्या आयुष्याचा अविभाज्य भाग बनला आहे. सार्वजनिक कार्यक्रमात, सभांमध्ये सहभागी होत राहीन. मी पुणे, मुंबई, बारामती, दिल्ली किंवा भारताच्या इतर कोणत्याही भागात असो, मी नेहमीप्रमाणेच तुम्हा सर्वांसाठी उपलब्ध आहे.'

पुढील पक्षप्रमुखाचे नाव निश्चित करण्यासाठी समिती स्थापन करण्यात आली आहे

पक्षप्रमुखपदाची जबाबदारी कोणाकडे द्यायची याचा निर्णय घेण्यासाठी समिती स्थापन करण्यात येणार असल्याचे पवार यांनी सांगितले. पॅनेलमध्ये सुप्रिया सुळे, अजित पवार, प्रफुल्ल पटेल, जयंत पाटील, अनिल देशमुख, राजेश टोपे, छगन भुजबळ आदी ज्येष्ठ सदस्य असावेत, असे ते म्हणाले.