राष्ट्रवादीचे खासदार अमोल कोल्हे (Amol Kolhe) हे ''Why I Killed Gandhi'' या चित्रपटात नथुराम गोडसेच्या भूमिकेत दिसणार आहेत. हा चित्रपट ३० जानेवारीला प्रदर्शित होणार आहे. खासदार अमोल कोल्हे (Amol Kolhe) यांनी या चित्रपटामध्ये नथुराम गोडसेची भूमिका साकारल्यामुळे राजकीय वर्तुळात चांगलीच चर्चा रंगली आहे. राष्ट्रवादी काँग्रेसच्या नेत्यांनीअमोल कोल्हेंच्या या भूमिकेला विरोध केला आहे. तर काहींनी मात्र कलाकार म्हणून त्यांनी केलेल्या भूमिकेची पाठराखण केली आहे.

दरम्यान या सर्व वादावर राष्ट्रवादी काँग्रेसचे अध्यक्ष शरद पवार (Sharad Pawar)यांनी पहिलीच प्रतिक्रिया दिली आहे. या संदर्भात त्यांनी खासदार अमोल कोल्हेंची पाठराखन केली. ते प्रसारमाध्यमांशी बोलताना म्हणाले की, अमोल कोल्हे हे एक कलाकार आहेत, त्यामूळे कलाकार म्हणून त्यांनी नथुराम गोडसेची (Nathuram Godse)भूमिका केली असल्याचं सांगितलं आहे.

सिनेमामध्ये कलाकार एखादी भूमिका घेत असेल तर त्याकडे आपण कलाकार म्हणून बघितले पाहिजे. गांधींवर सिनेमा प्रसिद्ध झाला आणि त्या माध्यमातून गांधीजींचं महत्व सर्व जगाला कळलं. त्यात ज्याने गांधी (Mahatma Gandhi)आणि नथुराम गोडसेची भूमिका साकारली ते कलाकार होते.

छत्रपती शिवाजी महाराजांच्या चित्रपटामध्ये अफजलखानाची भूमिका कोणी साकारली तर तो मुघल साम्रज्याचा पुरस्कर्ता होत नाही तर तो कलाकार म्हणून ती भूमिका साकारत असतो. भूमिका साकारल्यामुळे त्यांचे विचार तसे असतीलच असे नाही, असे ही शरद पवार म्हणाले.

अमोल कोल्हेंनी केलेली भूमिका ही कलाकार म्हणून केली. ज्यावेळी त्यांनी ही भूमिका साकारली त्यावेळी ते आमच्या संपर्का नव्हते. त्यांनी भूमिका केली याचा अर्थ गांधीजींच्या हत्येचं समर्थन करणार आहे, असा त्याचा अर्थ होत नाही. एक कलाकार म्हणून अमोल कोल्हेंना समर्थन आहे, असंही पवार म्हणाले.