मुंबई: मुंबई पोलिसांनी (Mumbai Police) बुधवारी देलेल्या माहितीनुसार, शहरात 16 डिसेंबर ते 31 डिसेंबर या कालावधीसाठी कलम 144 लागू करण्यात आले आहे. ओमिक्रॉनच्या पार्श्वभूमीवर हा निर्णय घेण्यात आला आहे.

देशाच्या अनेक भागात ओमिक्रॉनचे (Omicron variant) रुग्ण आढळत आहेत. आतापर्यंत महाराष्ट्रात 32 ओमिक्रॉन बाधित सापडले आहेत. पोलीस उपायुक्त आणि बृहन्मुंबईचे कार्यकारी दंडाधिकारी चैतन्य एस यांनी जारी केलेली अधिसूचना मुंबईत (Mumbai) 31 डिसेंबरपर्यंत लागू राहील. पोलिसांच्या आदेशात म्हटले आहे की, कोरोनाव्हायरसच्या ओमिक्रॉन प्रकाराने सतत उद्भवलेल्या धोक्याच्या पार्श्वभूमीवर हे निर्बंध लावण्यात आले आहेत.

अधिसूचने नुसार, पूर्णपणे लसीकरण झालेल्या व्यक्तींनाच शहरातील दुकानात आणि सर्व सार्वजनिक वाहतुकीत प्रवेश मिळेल. सार्वजनिक ठिकाणी होणाऱ्या कार्यक्रमाला आसन क्षमतेच्या 50 टक्केच जागा भरण्याची परवानगी आहे. तसेस उपस्थित लोकांचे लसीचे दोन्ही डोस घेतले असणे बंधनकारक आहे.

महाराष्ट्रात (Maharashtra) प्रवेश करणार्‍या व्यक्तींना लसीचे दोन्ही डोस घेणे बंधनकारक आहे किंवा प्रवेशाच्या 72 तासांच्या आत केलेल्या कोरोना चाचणीचा निकाल नकारात्मक असणे आवश्यक आहे. उल्लंघन करणाऱ्यांना भारतीय दंड संहितेच्या कलम 188 आणि इतर संबंधित दंडात्मक तरतुदींनुसार शिक्षा केली जाईल, असेही त्यात नमूद करण्यात आले आहे.