Raj Thackeray On Mumbai-Goa Highway : समृद्धी महामार्गासारखा मोठ्या लांबीचा महामार्ग विक्रमी वेळेत पुर्ण होऊ शकतो तर त्यापेक्षा अंतर असलेला मुंबई-गोवा महामार्ग का रखडला, असा सवाल महाराष्ट्र नवनिर्माण सेनेचे प्रमुख राज ठाकरे यांनी केला आहे. याबाबत राज ठाकरे यांनी केंद्रीय वाहतूक मंत्री नितिन गडकरी यांच्याशी चर्चा केली असून येत्या आठवड्यात या रस्त्याबाबत ठोस काय ते सांगू, असे गडकरी यांनी सांगितल्याचे राज ठाकरे म्हणाले.

पत्रकारांशी बोलताना राज ठाकरे म्हणाले की, गेल्या काही दिवसांपुर्वीच उपमुख्यमंत्री देवेंद्र फडणवीस यांची भेट घेतली होती आणि त्यांच्याशी कोकण रेल्वे आणि कोकणातील रस्त्यांबाबत बोलणे झाले होते. त्यांच्याशी या मुद्यावर पुन्हा एकदा बोलणे झाले, तेव्हा त्यांनी एकदा केंद्रीय वाहतूक मंत्री नितिन गडकरी यांच्याशी बोलून घ्या, असे सांगितले. गडकरी बंगळूरला होते. मी त्याच रात्री त्यांना फोन केला.

मी गडकरींना म्हणालो की, मी आत्ताच कोकणातून आलो आहे, तेथील रस्त्यांची अतिषय दुरवस्था झाली आहे. अत्यंत कमी वेळेत जर समृद्धी महामार्गासारखा महामार्ग होऊ शकतो तर मग त्याच्यापेक्षा लांबीने कमी असलेला कोकणाचा रस्ता का होत नाही? तुम्ही वैयक्तिक लक्ष घातल्याशिवाय हा रस्ता होणार नाही.

गडकरींनी सांगितले की, दोन काँट्रॅक्टर पळून गेले, पण या गोष्टी लोकांना सांगण्याच्या सबबी नाहीत. लोकांना रस्ता पाहिजे. लोकं दुसऱ्या मार्गाने गोव्याला जातात. घाटातून गोव्याकडे उतरतात. त्यावर गडकरींनी सांगितले की, याचे काय करायचे ते बघतो, आणि आठवड्याभरात सांगतो की कधी सुरू होईल आणि काय सुरू होईल.

राज ठाकरेंच्या या चर्चांमुळे आता मुंबई-गोवा महामार्गाच्या कामात केंद्रीय वाहतूक मंत्री नितिन गडकरी वैयक्तिक लक्ष देतील आणि या कामाला वेग येईल, अशी अपेक्षा केली जात आहे.