Raigad Accident : ज्यातील मुंबई शहरातील चेंबुर येथे एका खासगी क्लासची सहल मावळ येथे आली होती. सहल आटोपून परत जात असतांना ही बस पुणे मुंबई द्रुतगती मार्गावर बोरघाटात दरीत कोसळल्याने झालेल्या भीषण अपघातात दोन विद्यार्थी ठार झाले. तर 35 विद्यार्थी हे जखमी झाल्याची माहिती मिळाली आहे. जखमी विद्यार्थ्यांना खोपोलीतील एका खासगी रुग्णालयात दाखल करण्यात आले आहे. बसमध्ये तब्बल 48 जण होते.

या अपघातात ठार झालेल्या विद्यार्थ्यांची हितिका खन्ना आणि राज म्हात्रे अशी नावे आहेत. पोलिसांनी दिलेल्या माहितीनुसार चेंबुर येथील मयांक ट्युटोरिअल्स या खाजगी क्लासच्या विद्यार्थ्यांची सहल मावळ येथील वेट अँड जॉय या थीमपार्कला रविवारी सकाळी गेली होती. ही सहल आटोपून पुन्हा माघारी जात असतांना त्यांची बस ही पुणे मुंबईत द्रुतगती मार्गावरील बोरघाटात मॅजिक पॉईंटजवळ आली असता, त्यांच्या बसला अपघात होऊन ही बस घाटात कोसळली.

या भीषण अपघातात हितिका खन्ना आणि राज म्हात्रे यांचा जागीच मृत्यू झाला तर बस मधील 35 विद्यार्थी हे जखमी झाले आहेत. यातील काही जणांची प्रकृती ही गंभीर असल्याचे समजते. अपघाताची माहिती मिळताच महामार्ग पोलिस तातडीने घटनास्थळी पोहचले. त्यांनी तातडीने जखमी विद्यार्थांना बसमधून काढत त्यांना रुग्णालयात पाठवले.

दरम्यान परभणीत देखील एका शाळेची बस ही सहली साठी जात असतांना त्यांच्या बसला देखील अपघात झाला. यात काही विद्यार्थी हे जखमी झाले आहेत. गंगाखेड-राणीसावरगाव मार्गावर खंडाळी पाटीयेथे दोन बस समोरा समोर धडकल्याने 22 जण जखमी झाले होते.