दापोली: रत्नागिरी जिल्ह्यातील दापोलीच्या प्राजक्ता (सारा) बोंगाळे यांनी अमेरिकन सैन्यात भरती होऊन ऐतिहासिक कामगिरी केली आहे. अमेरिकन लष्कराचे अत्यंत कठीण प्रशिक्षण यशस्वीरीत्या पूर्ण करत अमेरिकी सैन्यात दाखल होणाऱ्या त्या पहिल्या मराठी महिला ठरल्या आहेत. त्यांच्या या उल्लेखनीय यशामुळे कोकणासह संपूर्ण महाराष्ट्राचा गौरव वाढला आहे.
प्राजक्ता बोंगाळे यांचे बालपण दापोलीत गेले. लहानपणापासूनच सैन्यात भरती होऊन देशसेवा करण्याचे त्यांचे स्वप्न होते; मात्र, एका अपघातामुळे भारतीय सैन्यात जाण्याची संधी हुकली. तरीही त्यांनी हार न मानता शिक्षण पूर्ण केले आणि पुढे अमेरिकेत स्थायिक होत क्लिनिकल रिसर्च सायंटिस्ट म्हणून यशस्वी कारकीर्द घडविली.
विज्ञान क्षेत्राबरोबरच त्यांनी ‘यूएसए मिसेस मिडवेस्ट युनिव्हर्स’ हा किताब जिंकून अष्टपैलू व्यक्तिमत्त्व सिद्ध केले. देशसेवेची ओढ कायम असल्याने त्यांनी पुन्हा एकदा सैन्यात जाण्याचा निर्धार केला आणि कठोर शारीरिक व मानसिक प्रशिक्षण यशस्वीपणे पूर्ण केले. सध्या त्या अमेरिकन सैन्याच्या वैद्यकीय विभागात कार्यरत आहेत. त्यांच्या या यशामागे पती समीर बोंगाळे आणि कुटुंबीयांचा आपल्याला मोलाचा पाठिंबा असल्याचे त्या सांगतात.
‘मार्क्समनशिप पदक’
या प्रशिक्षणादरम्यान उत्कृष्ट नेमबाजीसाठी त्यांना ‘मार्क्समनशिप पदक’ प्रदान करण्यात आले. तसेच, प्रशिक्षण बॅचमध्ये सर्वाधिक शैक्षणिक गुण मिळवत त्यांनी आपल्या बुद्धिमत्तेचीही छाप पाडली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.