Maharashtra Politics: महाराष्ट्राचे राज्यपाल भगतसिंग कोश्यारी यांनी छत्रपती शिवाजी महाराजांबद्दल केलेल्या टिप्पणीमुळे निर्माण झालेला वाद मिटताना दिसत नाही. गुरुवारी राष्ट्रवादी काँग्रेस पक्षाचे (राष्ट्रवादी) अध्यक्ष शरद पवार यांनी राज्यपालांवर सडकून टीका केली. त्यांनी सर्व मर्यादा ओलांडल्या आहेत, असे पवार म्हणाले.

दरम्यान, राज्यपाल भगतसिंग कोश्यारी यांनी शनिवारी औरंगाबाद येथील एका कार्यक्रमात छत्रपती शिवाजी महाराज हे जुन्या काळातील आदर्श असल्याचे म्हटले होते. राज्यपालांच्या या वक्तव्यानंतर महाराष्ट्रात राजकीय खळबळ उडाली आहे. कोश्यारी यांची पदावरुन हकालपट्टी करण्याच्या मागणीसाठी राष्ट्रवादी काँग्रेस, काँग्रेस (Congress), शिवसेना (उद्धव बाळासाहेब ठाकरे) आणि इतर संघटनांचे कार्यकर्ते निदर्शने करत आहेत.

सभ्यतेच्या सर्व मर्यादा ओलांडल्या

प्रसारमाध्यमांशी बोलताना पवार म्हणाले की, 'छत्रपती शिवाजी महाराजांबाबत कोश्यारी यांनी केलेल्या वक्तव्याचा मी निषेध करतो. त्यांनी सर्व मर्यादा ओलांडल्या आहेत. काल त्यांनी शिवाजी महाराजांची स्तुती केली, पण त्यांना हे खूप उशिरा शहाणपण आलं. मला वाटतं राष्ट्रपती आणि पंतप्रधानांनी योग्य तो निर्णय घ्यावा (कोश्यारीबद्दल). अशा लोकांना महत्त्वाची पदे देऊ नयेत.'

राष्ट्रवादी काँग्रेसचे सुप्रिमो शरद पवार (Sharad Pawar) पुढे म्हणाले की, 'राज्यपाल पद हे एखाद्या संस्थेचे प्रतिनिधित्व करते आणि त्या पदाची प्रतिष्ठा राखण्यासाठी आम्ही कोश्यारी यांच्या विरोधात कोणतेही भाष्य केले नाही.' या वक्तव्यावरुन राजकीय वादाच्या पार्श्वभूमीवर राज्यपाल भगतसिंग कोश्यारी गुरुवारी दोन दिवसांच्या दिल्ली दौऱ्यावर आहेत.

काँग्रेसने नवीन राज्यपाल नेमण्याची मागणी केली

छत्रपती शिवाजी महाराजांबद्दल केलेल्या वक्तव्याबद्दल महाराष्ट्रासाठी नवा राज्यपाल नेमावा आणि भगतसिंग कोश्यारी यांना त्यांच्या पदावरुन हटवावे, अशी मागणी काँग्रेस नेते आणि माजी मुख्यमंत्री अशोक चव्हाण यांनी मंगळवारी केली. राज्यपालांनी असे वादग्रस्त वक्तव्य करण्याची ही पहिलीच वेळ नसल्याचा दावा चव्हाण यांनी केला. घटनात्मक पदावर असलेल्या व्यक्तीने असे वक्तव्य करणे अशोभनीय असल्याचेही ते म्हणाले.

वादग्रस्त वक्तव्य पदावरुन हटवणार?

राज्यपाल भगतसिंग कोश्यारी यांनी मला राजीनामा द्यायचा आहे, असे सांगितल्याचा दावा राष्ट्रवादी काँग्रेसचे नेते अजित पवार यांनी बुधवारी केला. छत्रपती शिवाजी महाराजांबद्दल कोश्यारी यांनी केलेल्या वक्तव्याशी आपण असहमत असल्याचे ते म्हणाले.