नागपूर आणि गोव्याला जोडणाऱ्या शक्तिपीठ महामार्गास महाराष्ट्रातील शेतकऱ्यांचा विरोध वाढतच चालला आहे. यातच आता या महामार्गाविरोधात 12 जिल्ह्यातील शेतकरी संघटित झाले आहेत. नागपूर-गोवा महामार्ग तात्काळ रद्द करण्यात यावा. शक्तीपीठ महामार्ग रद्द झाल्याचा आदेश मुख्यमंत्री एकनाथ शिंदे यांनी घेऊन यावा. अन्यथा कोल्हापुरात पाय ठेवू देणार नाही, अशी तंबी शेतकऱ्यांनी दिली आहे.

दरम्यान, महाराष्ट्राचे मुख्यमंत्री एकनाथ शिंदे 20 ऑगस्ट रोजी कोल्हापूर दौऱ्यावर जाणार आहेत. मुख्यमंत्र्यांच्या या कोल्हापूर दौऱ्यात निदर्शने करण्यात येतील, असे शक्तीपीठ महामार्ग विरोधी संघर्ष समितीने सांगितले. नागपूर-गोवा महामार्ग रद्द केल्याशिवाय कोणत्याही मंत्र्यांना कोल्हापुरात पाय ठेवू देणार नाही, असा इशारा समितीने दिला.

नागपूर आणि गोवा महामार्गाला सर्वाधिक विरोध कोल्हापूर आणि सांगलीतील शेतकरी करतायेत. या दोन्ही जिल्ह्यासह एकूण 11 जिल्ह्यातून हा महामार्ग गेला आहे. नागपूर-गोवा शक्तीपीठ महामार्गाला कोल्हापूर जिल्ह्यातून विरोध वाढत असून, महामार्गात जमिनी जाणाऱ्या कागल तालुक्यातील शेतकरी एकवटले आहेत. शेतकऱ्यांनी महामार्ग विरोधी कृती समितीच्या माध्यमातून लढा सुरु केला आहे. नव्या महामार्गामुळे अनेक शेतकरी भूमिहीन होण्याची भीती शेतकऱ्यांनी व्यक्त केली आहे. तसेच, जुने मार्ग असताना नवा मार्ग कशासाठी असा सवाल देखील त्यांनी उपस्थित केला आहे.