कोकणात शिमगा (होळी) उत्सवाचा उत्साह शिगेला पोहोचला असतानाच, रेल्वेच्या विस्कळीत नियोजनाचा फटका प्रवाशांना बसला आहे. मुंबई सीएसएमटी (CSMT) येथून सुटणारी तेजस एक्सप्रेस सकाळी ५.५० वाजता सुटणार होती मात्र ही गाडी १२.५८ ला सुटली. सणासुदीच्या काळात गावी जाणाऱ्या प्रवाशांची पहिली पसंती असलेल्या या प्रीमियम ट्रेनच्या विलंबामुळे हजारो प्रवाशांमध्ये नाराजी पसरली आहे.

सकाळी ५.५० वाजता सुटणारी गाडी १२.५८ ला सुटली

तासांतासाला बदलणाऱ्या या वेळेमुळे प्रवाशांमध्ये संतापाचे वातावरण आहे. विशेषतः ठाणे, दादर आणि पनवेल स्थानकावर प्रवाशांची अलोट गर्दी पाहायला मिळत असून, लहान मुले आणि वृद्ध प्रवाशांचे प्रचंड हाल होत आहेत.

स्थानकांवर प्रवाशांची मोठी गर्दी

कोकणात होळीचा सण मोठ्या प्रमाणावर साजरा केला जातो, त्यामुळे मुंबईतून लाखो चाकरमानी गावी रवाना होतात. तेजस एक्सप्रेस ही आरामदायी आणि वेगवान असल्याने तिला मोठी मागणी असते. मात्र, आज गाडी सुटण्यास इतका विलंब झाल्याने प्रवाशांच्या नियोजनाचा पूर्णपणे बोजवारा उडाला आहे.

गाडीला इतका उशीर का झाला, याबाबत रेल्वेकडून अद्याप कोणतेही अधिकृत तांत्रिक कारण स्पष्ट करण्यात आलेले नाही. मात्र, ऐनवेळी अशा प्रकारचा विलंब झाल्याने कोकण रेल्वेच्या कार्यक्षमतेवर प्रश्नचिन्ह निर्माण झाले आहे. अनेक प्रवासी पर्यायी वाहतुकीचा विचार करत आहेत, मात्र खासगी बसेसचे दर गगनाला भिडल्याने सामान्यांची कोंडी झाली आहे.