कोकणात गेल्या काही दिवसांपासून पावसाने हाहाकार माजवला आहे. पावसामुळे मुंबई-गोवा महामार्ग तीन दिवसांसाठी बंद करण्यात आला होता. यातच आता, मुंबई-गोवा महामार्गाच्या मुद्यावरुन मनसे कार्यकर्ते पुन्हा आक्रमक झालेले पाहायला मिळाले.

पनवेल येथील पळस्पे फाट्याजवळ मनसकेडून आंदोलन करण्यात आले. मुंबई गोवा महामार्गावर पडलेले मोठमोठे खड्डे आणि निकृष्ट दर्जाच्या कामाविरोधात मनसेने हे आंदोलन केले. मनसेच्या कार्यकर्त्यांनी खड्ड्यांमध्ये बसून चक्क शाळाच भरवली. मनसे पनवेल शहराध्यक्ष योगेश चिले यावेळी हेडमास्टर झाले तर मनसे कार्यकर्ते विद्यार्थी झालेले पाहायला मिळाले.

लोकसभा निवडणुकीच्या पार्श्वभूमीवर मुंबईतील शिवाजी पार्कवरील महायुतीच्या सभेत महाराष्ट्र नवनिर्माण सेनेचे अध्यक्ष राज ठाकरे यांनी केलेल्या भाषणात मुंबई-गोवा महामार्गाच्या रखडलेल्या कामावर प्रकाश टाकला होता.

मुंबई गोवा महामार्गाच्या कामाला होत असलेल्या दिरंगाईबाबत मनसेने अनेक आंदोलने केली. या मुद्द्यावरुन राज ठाकरे यांनी सातत्याने सरकारला धारेवर धरले. गेल्या काही वर्षांपासून मुंबई गोवा महामार्ग बनवण्याचे काम सुरु आहे, मात्र तो अद्याप तयार झालेला नाही. त्याचे काम अपूर्णच आहे.

मुंबई-गोवा महामार्गाचे काम रखडण्याबाबत राज ठाकरे (Raj Thackeray) यांनी येथे सुरु असलेले जमिनीचे व्यवहार हे सर्वात मोठे कारण असल्याचे सांगितले होते. कोकणी लोकांच्या जमिनी कवडीमोल दराने विकल्या जात आहेत.

जेव्हा या महामार्गाचे काम पूर्ण होईल तेव्हा याच जमिनी व्यापाऱ्यांना विकल्या जातील. त्यामधून तुम्हाला काहीही मिळणार नाही. एकदा रस्ता झाला की आजूबाजूच्या जमिनींचे भाव गगनाला भिडतात हे समजून घ्या, असेही राज यांनी यापूर्वी सांगितले होते.