महाराष्ट्रातील सिंधुदुर्ग जिल्ह्यातील मालवण येथील तारकर्ली समुद्रकिनाऱ्यावर आज दुपारी एक पर्यटक बोट 20 पर्यटकांना घेऊन स्कुबा डायव्हिंग करून परतत असताना बुडाली. या अपघातात दोघांचा मृत्यू झाला असून अनेकांची प्रकृती चिंताजनक आहे. सहा पर्यटकांना मालवण ग्रामीण रुग्णालयात उपचारासाठी दाखल करण्यात आले आहे. बोटीतील इतर सर्व पर्यटकांना वाचवण्यात यश आले आहे. जय गजानन असे या बोटीचे नाव आहे.(maharashtra boat capsizes near malvan in sindhudurg many people died rescue operation underway)

या अपघाताची गांभीर्याने दखल घेत प्रशासनाने बोट चालक व मालकावर तातडीने कारवाई करण्याचे निर्देश दिले आहेत. या बोटीची प्रवासी क्षमता किती होती, सर्व पर्यटकांना लाईफ जॅकेट देण्यात आली होती का, याचा तपास करण्यात येत आहे. पोलीस आणि जिल्हाधिकारी घटनास्थळी हजर आहेत. या अपघातात निष्काळजीपणा आढळल्यास त्यांच्यावर कडक कारवाई करण्यात येईल.

दरम्यान, अपघातात मृत्युमुखी पडलेले पर्यटक हे मुंबई आणि पुण्यातील रहिवासी असल्याची प्राथमिक माहिती समोर येत आहे. मिळालेल्या माहितीनुसार, बोटीत 15 ते 20 लोक होते. 12.30 च्या सुमारास समुद्रात मोठ्या लाटा उसळू लागल्या. या लाटांपासून सुटण्याच्या प्रयत्नात बोट लाटांचा तडाखा बसली आणि ती एका बाजूला उलटली. बोट दोन ते तीन वेळा उलटल्याचे प्रत्यक्षदर्शींनी सांगितले. लाटा बोटीला ढकलत होत्या. त्याचबरोबर अनेकांच्या नाका-तोंडाला पाणी आले.