मुंबई : कोकणात गाडी घेऊन जाण्याची कल्पना पूर्वी फक्त स्वप्नातच शक्य होती. पण आता ‘M2M RORO Ferry’ मुळे हा प्रवास केवळ शक्यच नाही, तर अतिशय आरामदायी आणि थाटामाटातला ठरतो आहे. मुंबई ते कोकण मार्गावरील रो-रो सेवेचा सध्या प्रवास मुंबई ते मांडवा (अलिबाग) या मार्गावर सुरु आहे.

या प्रवासाचा अविस्मरणीय अनुभव एका पर्यटकानं सोशल मीडियावर शेअर केला असून, हा व्हिडिओ सध्या @nusta_fir या इन्स्टाग्राम खात्यावरून प्रचंड व्हायरल झाला आहे.

पर्यटकानं सांगितलं की, “मी मुंबईतील भाऊचा धक्का येथून ‘M2M’ फेरीने मांडवा (अलिबाग) पर्यंत प्रवास केला. तिकिटे मी ऑनलाईन बुक केली होती. बोटीवर एकूण ६६५ प्रवाशांची व्यवस्था असून, ५० कार, ३० दुचाकी आणि लहान-मोठ्या बससुद्धा सहज नेऊ शकतो.”

रो-रो फेरीत चार वेगवेगळ्या क्लासेसची व्यवस्था

1. इकोनॉमी क्लास : दर ₹२५००, एकूण ५५२ सीट्स. यामध्ये आरामदायी बैठक व्यवस्था आणि कॅफेची सुविधाही आहे.

2. प्रीमियम क्लास : दर ₹५५००, ४४ सीट्स. अधिक प्रशस्त आसनं आणि आरामदायी वातावरण.

3. बिझनेस क्लास : दर ₹७५००, ४८ सीट्स. एसी, मोबाईल चार्जिंग पॉइंट आणि उत्कृष्ट दर्जाचे बाथरूम यांसारख्या सर्व सुविधा येथे उपलब्ध आहेत. सीटवर बसून भोजनाचीही व्यवस्था आहे.

4. फर्स्ट क्लास : दर ₹९०००, १२ आलिशान सीट्स. समुद्र प्रवासाचा राजेशाही अनुभव देणारा हा क्लास अनेक पर्यटकांचा आवडता ठरत आहे.

फेरीमध्ये वाहन नेण्यासाठीही उत्तम सोय करण्यात आली आहे. दुचाकीसाठी शुल्क ₹१०००, कारसाठी ₹६०००, तर मिनी बससाठी ₹१३,००० आहे. प्रवासादरम्यान समुद्राचा नजारा, बोटीवरील सुखसोयी आणि शांत वातावरणामुळे हा प्रवास खरोखरच ‘थाटाचा अनुभव’ ठरतो.

या फेरी सेवेने मुंबई-कोकण प्रवासाचा चेहरामोहरा बदलला आहे. विशेषत: कोकणात जाणाऱ्या पर्यटकांसाठी ही सेवा सोयीस्कर, वेळ वाचवणारी आणि एक वेगळाच अनुभव देणारी ठरत आहे. सोशल मीडियावरही या सेवेबद्दल प्रचंड प्रतिसाद मिळत असून, अनेक जण आता कोकण प्रवासासाठी ‘M2M RORO Ferry’ हाच पर्याय निवडत आहेत.