सिंधुदुर्ग: कुडाळ येथून मालवणच्या दिशेने निघालेली एसटी बस आणि धामापूरकडे जाणाऱ्या डंपर यांच्यात मंगळवारी (२० मे) दुपारी भीषण अपघात घडला. हा अपघात चौके येथील नारायण वाडी परिसरात दुपारी १२.३० वाजण्याच्या सुमारास झाला. समोरासमोर झालेल्या जोरदार धडकेत एसटी बसचे मोठ्या प्रमाणावर नुकसान झाले असले तरी, सुदैवाने या अपघातात कोणतीही जीवितहानी झाली नाही.

मालवण आगाराची एसटी बस कुडाळहून मालवणकडे जात असताना, समोरून येणाऱ्या डंपरने बसला जोरदार धडक दिली. या अपघातात बसचालक किरकोळ जखमी झाला असून, बसमधील काही प्रवाशांनाही दुखापत झाली.

तात्काळ मदतीसाठी घटनास्थळी स्थानिक नागरिकांनी धाव घेतली आणि जखमींना नजीकच्या दवाखान्यात प्राथमिक उपचारासाठी हलविण्यात आले.

अपघातात बसच्या समोरच्या भागाचं मोठं नुकसान झालं आहे. अपघाताची माहिती मिळताच मालवण एसटी आगारातील अधिकारी घटनास्थळी दाखल झाले. बसचे चालक आणि वाहक यांनी अपघाताची माहिती आगारात दिली असून, एसटी प्रशासनाकडून अपघाताचा पंचनामा करून आवश्यक ती कार्यवाही सुरू करण्यात आली आहे.