कोकणात सध्या पावसानं हाहाकार माजवला आहे. या मुसळधार पावसामुळे पुन्हा एकदा कोकण रेल्वे ठप्प झाली. कोकण रेल्वे मार्गावर खेडजवळ कशेडी बोगद्यासमोर दरड कोसळल्याने या मार्गावरील रेल्वे सेवा ठप्प झाली. मात्र आता दोन-तीन तासात कोकण रेल्वेची सेवा पूर्ववत होणार असल्याचे सांगितले जात आहे.

मागील दोन-तीन तासांपासून दिवाणखवटी बोगद्याजवळ ट्रॅकवर दरड बाजूला करण्याचे काम युद्धपातळीवर सुरु आहे. पावसामुळे अजूनही ट्रॅकवर माती आणि चिखल आहे. चिपळूणमध्ये मोठ्याप्रमाणात प्रवाशांनी गर्दी केली आहे. तर काही तासांपासून इथे रखडेलेले प्रवासी ताटकळत बसले आहेत. चिपळूण प्लॅटफॉर्मवर 17 तांसापासून गुजरातला (Gujarat) जाणारी रेल्वे थांबलेली आहे. मिळालेल्या माहितीनुसार, रेल्वे प्रशासनाकडून माती आणि चिखल काढण्याचे काम सुरु आहे.

दरम्यान, कोकणात गेल्या दोन दिवसांपासून पावसान धूमशान घातलं आहे. पुढील काही दिवस पावसाचा जोर कायम राहणार असल्याचे हवामान खात्याकडून सांगण्यात आले आहे. या पावसाचा मोठा फटका कोकण रेल्वेला बसला आहे. दिवाणखवटी नातुवाडी बोगद्याजवळ माती आणि झाडे उन्मळून ट्रॅकवर पडल्याने कोकण रेल्वे मार्गावरील वाहतूक ठप्प झाली.

दुसरीकडे, कोकण रेल्वेकडून (Konkan Railway) कोणत्या गाड्या रद्द केल्या तर अनेक गाड्या दुसऱ्या मार्गाने वळवण्यात आल्या. प्रवाशांना गाड्या रद्द आणि मार्ग बदलल्याने मोठ्या त्रासाचा सामना करावा लागत आहे. गेल्या 12 तासांपासून प्रवासी ताटकळत रेल्वे प्लॅटफॉर्मवर बसले आहेत.