बेळगाव: कर्नाटक (Karnataka) राज्य सरकारने आजपासून सर्वत्र अनलॉक (Unlock) केले आहे. त्यामुळे राज्यात आजपासूनच सर्व व्यवहार पूर्ववत सुरु राहणार आहेत. महाराष्ट्र (Maharashtra) राज्यातही अनलॉक असल्याने तेथील व्यवहार सुरळीत सुरू असल्याचे दिसत आहे. म्हणून याच पार्श्वभूमिवर कर्नाटक राज्य परिवहन महामंडळाने सोमवारपासून स्थानिकसह आंतरराज्य बससेवा (Bus Services) सुरु करण्याचा निर्णय घेतला आहे. मध्यंतरी कर्नाटक सरकराने आंतरराज्य बससेवा सुरु केली होती. मात्र प्रवासी नसल्याने ती बंदही केली होती. त्याचबरोबर सातारा आणि कोल्हापूर जिल्हात जाणारी बस सेवाही सुरू केली होती. (Karnataka State Transport Corporation has decided to start inter-state bus service)

आता लॉकडाऊनच्या नियमांमध्ये शिथिलता दिल्याने आंतरराज्यसह ग्रामीण भागातील सर्व मार्गावर बसेस धावणार आहेत. त्यामुळे प्रवाशांसह मजुरांना देखील दिलासा मिळाला आहे. कर्नाटक राज्य परिहवन विभागाच्या वरिष्ठ विभागाने कोरोनाचा वाढता संसर्ग बघता 50 टक्के बस प्रवासी क्षमतेने वाहतूक करण्याची परवानगी एस. टी. महामंडळाला दिली होती. मात्र आता सर्वत्र अनलॉक झाल्यामुळे राज्य परिवहन महामंडळाने पूर्ण क्षमतेने (100 टक्के) प्रवासी वाहतूक सुरू करण्याची परवानगी दिली आहे.

त्यामुळे सध्या राज्यातून इचलकरंजी, गडहिंग्लज, बंगळूर, धारवाड, बेळगाव, हुबळी, दावणगिरी, हावेरी, हनगल या मार्गावर पूर्ण क्षमतेने बससेवा सुरु करण्यात आली आहे. या भागात जाणाऱ्या प्रवाशांकडून समाधान व्यक्त होत आहे.