Sindhudurg: सिंधुदुर्ग जिल्ह्यात (Sindhudurg) सध्या ग्रांमपंचायत निवडणुकीचा हंगाम सुरू आहे. 18 डिसेंबर रोजी ग्रामपंचायतीसाठी मतदान होणार आहे. याच निमित्ताने ग्रामपंचायत निवडणुकीच्या प्रचारासाठी नितेश राणे हे नांदगावमध्ये प्रचाराला आले होते. नितेश राणे यांनी कणकवली (Kankavli) तालुक्यातील नांदगाव येथील ग्रामस्थांना थेट धमकीच दिली आहे. माझ्या विचारांचा सरपंच निवडून आला नाही तर मी तुमच्या गावाला निधीच देणार नाही. असे वक्तव्य नितेश राणे (Nitesh Rane) यांनी केले.

नितेश राणे यांनी केलेल्या या भाषणाचा व्हिडिओ सध्या सोशल मिडियावर चांगलाच व्हायरल होत आहे. यात नितेश राणे ग्रामस्थांना थेट धमकी देताना दिसत आहेत. "जे गाव माझ्या विचाराचा सरपंच मला देईल, त्यात गावाचा मी विकास करीन, नाहीतर करणार नाही स्पष्ट सांगतो. माझ्याकडे कॅल्क्युलेशन आहेत. आपण लपाछपवीवाले नाही. राणे साहेबांच्या तालमीमध्ये तयार झालेले आम्ही विद्यार्थी आहोत. आम्ही पोटात एक पोटात असं नाही. चुकून पण इथे माझ्या विचाराच्या सरपंच झाला नाही तर मी एकही रुपयांचा निधी देणार नाही. एवढी काळजी निश्चितपणे घेईन." असे नितेश राणे म्हणाले.

"जिल्हा नियोजन, ग्रामविकास, 25:15 निधी असो किंवा केंद्र सरकारचा निधी असो. हा निधी कोणाला द्यायचा त्याची सर्व सूत्रं माझ्या हातात आहेत. पालकमंत्री असो, जिल्हाधिकारी असो, संबंधित कुठलाही मंत्री असो, उपमुख्यमंत्री असो किंवा मुख्यमंत्री, कोणीही मला विचारल्याशिवाय नांदगावमध्ये निधी देणार नाहीत." असेही नितेश राणे म्हणाले. यावरून नितेश राणे यांच्यावर टीका होत आहे. सिंधुदुर्ग जिल्ह्यातील देवगड, दोडामार्ग , कणकवली , कुडाळ, मालवण सावंतवाडी , वैभववाडी, वेंगुर्ला तालुक्यातील ग्रामपंचायतींसाठी 18 डिसेंबर रोजी मतदान होणार आहे.